قازاقستاندىق ساپانىڭ جاڭا بەلگىسى بەرىلەدى

استانا. قازاقپارات - قازاقستاننىڭ ساپا جانە يننوۆاتسيالىق مەنەدجمەنت ۇيىمى وتاندىق تاۋارلار مەن قىزمەتتەرگە ءوز بەلگىسىن بەرۋدى كوزدەيدى، دەپ حابارلايدى قازاقپارات ءتىلشىسى.

ۇيىم باسشىسى ازات ءابدىراحمانوۆتىڭ ايتۋىنشا، جاڭا بەلگىگە ەۋروپانىڭ ساپا ۇيىمى جانە قىتايدىڭ ساپا قاۋىمداستىعى كەپىلدىك بەرىپ وتىر. «دەمەك، اتالعان ۇيىمدار ءبىزدىڭ بەرگەن ديپلومىمىزدى مويىندايدى. وسىلايشا، وتاندىق تاۋارلار مەن قىزمەتتەردى حالىقارالىق دارەجەدە تانىمال ەتۋگە مۇمكىندىك بار. سەبەبى تاۋاردىڭ قاپتاماسىندا «قازاقستاندىق ساپا بەلگىسى» دەگەن جازۋمەن بىرگە سول ۇيىمداردىڭ اتاۋلارى دا كورسەتىلەدى. «اتامەكەن» ۇلتتىق كاسىپكەرلەر پالاتاسى دا قولداپ جاتىر. ەندى، ءبىز كاسىپكەرلەردى جاڭا بەلگىنى الۋعا مىندەتتەي المايمىز. ول - ءاربىر بيزنەسمەننىڭ ءوز ەركى. وتاندىق كاسىپورىندار جاڭا بەلگىنى الامىن دەسە، ءبىز دايىنبىز. ءوتىنىم بەرىلسە، جەڭىل اۋديت وتكىزەمىز. ال تاۋاردىڭ ساپاسىنا كوز جەتكىزگەننەن كەيىن كۋالىكتى بەرە الامىز. ءبىزدىڭ ماماندارىمىز دايىن، ساپا تالاپتارى دا ازىرلەندى. اۋديت وتكىزۋدىڭ ءتارتىبى بەكىتىلگەن»، - دەدى ا. ءابدىراحمانوۆ قازاقپارات تىلشىسىنە بەرگەن سۇحباتىندا.

ماماننىڭ سوزىنە قاراعاندا، ساپاعا قاتىستى سان الۋان ديپلومدارعا سەنە بەرۋگە بولمايدى. سەبەبى ونداي قۇجاتتار ساپانىڭ كورسەتكىشى ەمەس.

 «مىسالى، ساتىپ الاتىن ديپلومدار مەن كۋالىكتەر بولادى. وندايدا ءوز ءونىمىڭىزدى اپاراسىز دا، سونىڭ ۇستىنە 1000 دوللار تولەسەڭىز، سىزگە ادەمى رامكامەن كۋالىك بەرە سالادى. ال ۇلتتىق كونكۋرسقا، ءيا بولماسا، حالىقارالىق بايقاۋعا، ماسەلەن ەۋروپانىڭ ساپا كونكۋرسى بار، ازيا ساپا كونكۋرسى بار، سول جەردەن جەڭىپ شىقساڭىز، وندا بولادى. ايتپەسە، بىرەۋلەر ۇيىمداستىراتىن تولىپ جاتقان رەيتينگتەر بار. نەگىزى، رەيتينگتەر دە ساتىپ الىنادى. سونىڭ ديپلومدارىن تولتىرىپ قويسا، ول ءونىمنىڭ كورسەتكىشى ەمەس. رەسمي مەدالدار، رەسمي كونكۋرستاردىڭ كۋالىكتەرى بولۋى قاجەت»، - دەپ اتاپ كورسەتتى ا. ءابدىراحمانوۆ.

اۆتور: ارمان اسقاروۆ