شيەلىدە سيىر سۇتىنەن قىمىز سۋسىنى شىعارىلماق

شيەلى. قازاقپارات - قىزىلوردا وبلىسىنىڭ شيەلى اۋدانىندا ءسۇت وندەۋ كاسىپورنىنىڭ تەحنولوگى بايان دۇيسەنبەك سيىر سۇتىنەن قىمىز سۋسىنىن شىعارۋ ءىسىن قولعا الدى، دەپ حابارلايدى قازاقپارات ءتىلشىسى.

ول 2016-جىلدان بەرى اتالمىش كاسىپورىندا قىزمەت ەتىپ كەلەدى. 2015-جىلى ەۋرازيا ۇلتتىق ۋنيۆەرسيتەتىنىڭ بيوتەحنولوگيا ماماندىعىن ۇزدىك ءتامامداعان ول، قازىرگى تاڭدا الماتى تەحنولوگيالىق ۋنيۆەرسيتەتىنىڭ ماگيسترانتى.

بايان دۇيسەنبەك ەۋرازيا ۇلتتىق ۋنيۆەرسيتەتىنىڭ كافەدرا مەڭگەرۋشىسى، بيولوگيا عىلىمىنىڭ دوكتورى ءاسيا سەرىكبايەۆامەن بىرگە ءبىرقاتار زەرتتەۋ جوبالارىن جۇرگىزگەن.

ءبىز بۇعان دەيىن بايان دۇيسەنبەكتىڭ ءسۇت ونىمدەرىن 5 ايعا دەيىن ساقتاۋعا بولاتىن جاڭا اشىتقىنى وندىرىسكە ەنگىزگەنىن حابارلاعان ەدىك.

قىزىلوردالىق جاس عالىم ەندى سيىر سۇتىنەن قىمىزعا ۇقساس سۋسىن جاساماق. ول بۇل جوبانىڭ دا ءساتتى شىعاتىنىنا زور سەنىمدە.

«قازىرگى تاڭدا سيىر سۇتىنەن قىمىز وڭدەۋ ءىسىن جۇرگىزىپ جاتىرمىز. بۇل جوبانى ۇلتتىق ساراپتاما ورتالىعىمەن بىرگە قولعا الدىق. وسىنىڭ ناتيجەسىندە قىمىز سۋسىنىن جاساپ شىعاردىق. كادىمگى قىمىزبەن سالىستىرعاندا بۇل سۋسىننىڭ اسا كوپ ايىرماشىلىعى جوق. ءدامى مەن ساپاسىنا كەلەتىن بولساق، كادىمگى قىمىزبەن تەڭ دارەجەدە دەپ ايتۋعا نەگىز بار. بۇل جوبا ەلىمىز بويىنشا العاش رەت قولعا الىنىپ وتىر. قازىر ونى پاتەنتتەپ جاتىرمىز. سۋسىن اۋامەن قانىقتىرۋ ىسىمەن ازىرلەنەدى. كەلەسى جىلدان باستاپ ەلىمىزدىڭ بارلىق ايماعىنا شىعارساق دەگەن جوسپارىمىز بار. ساۋىلعان تازا قىمىز بولماسا دا حيميالىق تاعامدىق قۇرامى، ميكروەلەمەنتتەرى كادىمگى قىمىزبەن پارا-پار»، - دەدى بايان دۇيسەنبەك.

اتالمىش جوبادا ول سيىر سۇتىنەن شىعاتىن كوك سۋدى پايدالانادى. كەيىن كوك سۋ قىمىزعا ۇقساۋ ءۇشىن قالىپقا كەلتىرىلەدى.

الداعى ۋاقىتتا ب. دۇيسەنبەك سيىردىڭ قانى ارقىلى ونىڭ اۋرۋىن انىقتايتىن عىلىمي-تاجىريبەلىك جۇمىستى قولعا الۋدى جوسپارلاپ وتىر. ول «يممۋنوحروماتوگرافيالىق تەست جۇيەسى» ارقىلى مال اۋرۋىن 20 مينۋت ىشىندە انىقتاماق. سونىڭ ىشىندە مالدان اۋسىل اۋرۋىن انىقتاۋدا عىلىمي-تاجىريبەلىك جۇمىستار جاسالدى.

ايتا كەتەيىك، وسىدان ەكى جىل بۇرىن ناۋرىز مەرەكەسى قارساڭىندا شيەلىدە شۇبات وڭدەيتىن سەح ىسكە قوسىلدى. كاسىپكەر سابىر ەرماحانوۆتىڭ باستاماسىمەن اشىلعان سەحتا 7 ءتۇرلى ءونىم وندىرىلەدى.

«ارۋ انا» ءسۇت ونىمدەرىن وڭدەۋ سەحى حالىقتى شۇبات، ايران، سۇزبە، قىمىز، ىرىمشىك، بالمۇزداق ونىمدەرىمەن قامتاماسىز ەتىپ وتىر. مايلىلىعى 6 پايىز بالمۇزداقتىڭ مۇندا شوكولادتى، ۆانيلدى، قۇلپىنايلى «بۋبل گۋم» كىلەگەيلى تۇرلەرى وندىرىلەدى. تاۋلىگىنە 600 ليتردەن اسا شۇبات دايىندالادى. بيىلدان باستاپ شۇباتتان بالمۇزداق شىعارىلا باستادى. جاپونيادان اكەلىنگەن اپپارات كۇنىنە 200 ليتر ءسۇتتى بالمۇزداققا اينالدىرا الادى.