استانا جاستارى قانشا جاستا وتباسىن قۇراتىنى انىقتالدى
ەلوردا اكىمدىگىنىڭ رەسمي سايتىندا قوعامنىڭ جاڭا ۇياشىعىن قۇرۋداعى سوڭعى تەندەنتسيالار اتاپ ءوتىلدى، دەپ حابارلايدى قازاقپارات.
ا ح ا ت ماماندارىنىڭ مالىمەتىنشە، 2018-جىلدىڭ العاشقى جارتىجىلدىعىندا استانادا 5454 نەكە تىركەلدى. وتكەن جىلدىڭ سايكەس كەزەڭىندە 4960 وتباسى قۇرىلعان. وسىلايشا، استاناداعى جاس وتباسىلاردىڭ سانى وتكەن جىلمەن سالىستىرعاندا 10 پايىزعا ارتقانىن بايقاۋعا بولادى.
سارىارقا اۋدانى اكىمدىگىنىڭ ا ح ا ت ءبولىمى جەتەكشىسى باحىتگۇل شايكەنوۆانىڭ اقپاراتىنا سۇيەنسەك، قالا تۇرعىندارى بۇرىنعىعا قاراعاندا وتباسىن اناعۇرلىم ەسەيگەن جاستا قۇرعىسى كەلەدى. وسىلايشا سوڭعى 20 -جىل ىشىندە نەكەگە تۇرۋدىڭ ورتاشا جاسى شامامەن 10 جىلعا وسكەن. بۇگىنگى تاڭدا ەلوردا جاستارى 25 تەن اسقاندا عانا شاڭىراق كوتەرۋ ءجون دەپ سانايدى.
«قازىرگى تاڭدا جاستار بۇل ماسەلەنى بارىنشا تارازىلاپ، وتباسى قۇرادى. بويجەتكەندەر مەن ەر ازاماتتار ەسەيگەن سايىن بالالارىنا، جانۇياسىنا كوپ كوڭىل بولۋگە تىرىسادى. بۇدان 10-20 جىل بۇرىن اتا-انالار بالالارىمەن بىرگە وسەتىن. ەگەر 2000-جىلداردىڭ باسىندا نەكە تۇرۋ جاسى 20-21 جاس بولسا، بۇگىن بۇل كورسەتكىش شامامەن 7-10 جىلعا ۇلعايىپ وتىر.
قازىرگى تاڭدا بۇل تۇرعىدا 25+ جاسى كەڭ تارالعان. جاستار كوبىنە 28-30 جاسىندا نەكەگە تۇرادى. كەيبىرى ءتىپتى 33 جاسىندا ۇيلەنەدى»، - دەيدى ب. شايكەنوۆا.
سونداي-اق ول قازىرگى كەزدە ەر ازاماتتار وزىنەن بىرنەشە جاسقا ۇلكەن قىزداردى جۇبايى ەتىپ تاڭدايتىنىن ايتۋدا.
«بۇرىن قالىڭدىقتىڭ جاسى كىشىرەك بولسا، قازىر كوبىنە كۇيەۋ جىگىت جاسىراق. ەر ازاماتتار وزىنەن ءبىر-ەكى جاسقا عانا ەمەس، 5-10 جاسقا ۇلكەن بويجەتكەندەرگە ۇيلەنەدى»، - دەپ اتاپ ءوتتى باحىتگۇل شايكەنوۆا.
سونىمەن قاتار استانانىڭ جاس تۇرعىندارى اراسىندا شەتەلدىك ازاماتتارمەن وتاۋ تىگۋ جاعدايلارى جيىلەگەن.
«كوبىنە بويجەتكەندەر شەتەلدىك ازاماتتارعا تۇرمىسقا شىعادى. ءبىزدىڭ قىزدار افريكا ەلدەرىنىڭ ازاماتتارىن جار ەتىپ تاڭدايتىن جاعدايلار از ەمەس. تاڭعالاتىنى جوق. قازىرگى كەزدە شەكارا اشىق ەمەس پە؟ ! ءبىزدىڭ ەلدىڭ ازاماتتارى شەتەلگە ءجيى شىعىپ، ءجيى ساياحاتتايتىن بولدى. الەمنىڭ تۇكپىر- تۇكپىرىندە قازاقستان جايلى جاقسى بىلەتىن بولدى»، - دەدى سپيكەر.
ايتا كەتەيىك، «نەكە جانە وتباسى» تۋرالى ق ر زاڭىنا سايكەس، ەر جانە ايەل ادامدار 18 جاستان باستاپ نەكەگە تۇرا الادى. بەلگىلى سەبەپتەرگە بايلانىستى عانا جەرگىلىكتى ا ح ا ت ورگاندارى نەكە جاسىن 2 جاسقا تومەندەتە الادى.
