بۇگىن - وتباسى كۇنى

استانا. قازاقپارات - بۇگىن قازاقستاندا وتباسى كۇنى مەرەكەسى اتاپ وتىلەدى، دەپ حابارلايدى قازاقپارات.

2013-جىلى ق ر پرەزيدەنتى نۇرسۇلتان نازاربايەۆ «قازاقستان رەسپۋبليكاسىنداعى كاسىپتىك جانە وزگە دە مەرەكەلەر» تۋرالى جارلىققا وزگەرىس ەنگىزىپ، قىركۇيەكتىڭ ەكىنشى جەكسەنبىسىن وتباسى كۇنى دەپ بەلگىلەگەن بولاتىن.

«ءبىزدىڭ قوعامدا وتباسى ءارقاشاندا رۋحاني جانە مادەني داستۇرلەردىڭ ساقتاۋشىسى، ءتۇرلى بۋىندار اراسىن جالعاستىرۋشى بولدى جانە سولاي بولىپ قالا بەرمەك. وتباسى كۇنى ءبىزدىڭ قوعامىمىزدا رۋحانيلىقتى، ونەگەلىلىكتى نىعايتۋعا، ەرلى-زايىپتىلار جاۋاپكەرشىلىگىنىڭ ماڭىزدىلىعىن ءسوزسىز مويىنداۋعا ىقپال ەتەدى»، - دەگەن بولاتىن مەملەكەت باسشىسى وتباسى كۇنىنە ارنالعان العاشقى قۇتتىقتاۋىندا.

بۇل كۇنى ەلىمىزدىڭ تۇكپىر-تۇكپىرىندە وتباسى قۇندىلىقتارىن ناسيحاتتاۋعا ارنالعان ءتۇرلى شارالار ۇيىمداستىرىلىپ، جەرگىلىكتى اتقارۋشى ورگاندار تاراپىنان ۇلگىلى وتباسىلارعا سىي- قۇرمەت كورسەتىلەدى. 2014-جىلدان بەرى مەملەكەت باسشىسىنىڭ ۇسىنىسىمەن اتالمىش مەرەكەگە وراي «مەرەيلى وتباسى» ۇلتتىق بايقاۋى وتكىزىلىپ كەلەدى. وندا وتباسى مۇشەلەرىنىڭ جەتىستىكتەرى مەن ولاردىڭ ماڭىزدىلىعى ەسكەرىلەدى. بەس جىلدا بۇل بايقاۋدا 11 993 جانۇيا باق سىنادى.

ەسكە سالا كەتسەك، كەشە ەلورداداعى «قازاقستان» ورتالىق كونتسەرت زالىندا «مەرەيلى وتباسى» ۇلتتىق كونكۋرسىنىڭ 2018-جىلعى جەڭىمپازى انىقتالدى. باس جۇلدەنى جامبىلدىق نيازقۇلوۆتار وتباسى ەنشىلەدى. ۇستازدار اۋلەتىنىڭ ءۇش بۋىنىنىڭ جالپى پەداگوگيكالىق ءوتىلى - 198 -جىل.