الماتىدا جۇكتى ايەل پوليتسيا بەكەتىندە بوسانىپ قالا جازدادى

استانا. قازاقپارات - الماتىنىڭ جول-پاترۋلدىك پوليتسەيلەرى تولعاق قىسقان ايەلگە كومەكتەستى، دەپ حابارلايدى قازاقپارات ءتىلشىسى الماتى قالالىق ىشكى ىستەر دەپارتامەنتىنە سىلتەمە جاساپ.

وقيعا كەشە، 8- قىركۇيەك كۇنى الماتىنىڭ پەرۆومايسكايا كوشەسىندەگى پوليتسيا بەكەتىندە بولعان.

«بەكەت ماڭىنا «نيسان المەرا» كولىگى توقتاپ، ونىڭ جۇرگىزۋشىسى ايەلى بوسانىپ جاتقانىن ايتتى. ولار الماتى وبلىسىنداعى ءبىر ەلدى مەكەننەن قالاعا كەلە جاتىر ەكەن.

جول ۇستىندە جۇكتى ايەلدىڭ سۋى كەتىپ، تولعاعى باستالعان. كۇيەۋى جول ۇستىندە «103» قىزمەتىنە حابارلاسا الماي، ءبىزدىڭ بەكەتكە توقتاپتى. ارىپتەسىم اعا سەرجانت باقىتجان مىرزاتايەۆ جەدەل جاردەم شاقىرىپ جاتقاندا، ايەلدىڭ جاعدايىن تەكسەردىم. بالا بوسانۋ جولدارىنا جاقىنداپ قالعان ەكەن، ايەلدى بوساندىرىپ الۋعا دايىندالىپ جاتتىق»، - دەپ باياندادى الماتى ءى ءى د جەرگىلىكتى پوليتسيا قىزمەتى جول- پاترۋلدىك جاساعىنىڭ ينسپەكتورى ايدىن مايلىحانوۆ.

پوليتسەيدىڭ ايتۋىنشا، قىسىلتاياڭ ساتتە قوبالجۋعا دا ۋاقىت بولماعان. «كومەك سۇراپ كەلگەن ايەلدىڭ كۇيەۋىن جاقىن ماڭداعى جانارماي قۇيۋ بەكەتىنە بەس ليترلىك سۋ اكەلۋگە جۇمسادىم. لاجى بولعاندا ءدارى سالىنعان قورابىمىزدا مەديتسينالىق كەرەك-جاراقتىڭ ءبارى بولدى. تازا ورامال تاپپاعان سوڭ، سەرىكتەسىم مىرزاتايەۆ ءوز جەيدەسىن شەشىپ، دايىن تۇردى. جانىمىزدا شۇعىل ارەكەت ەتۋ جاساعىنىڭ جاۋىنگەرى، پوليتسيا كاپيتانى مەرەي اتىمتايەۆ تا بولعان ەدى. سول ساتتە جەدەل جاردەم قىزمەتى دە جەتىپ، ايەلدى 4№ پەرزەنتحاناعا الىپ كەتتى. پەرزەنتحاناعا جەتكەنشە، جەدەل جاردەمگە پوليتسيا كولىگىمەن ىلەسىپ باردىق»، - دەيدى ا. مايلىحانوۆ.

بەلگىلى بولعانداي، 26 جاستاعى الماتىلىق ايەل امان-ەسەن ۇل بالانى دۇنيەگە اكەلدى. بۇل - جاس انانىڭ ەكىنشى ءسابيى. «بەيتانىس ايەل مەن جاڭا تۋعان سابيگە مىقتى دەنساۋلىق تىلەيمىز. دەمالىس كۇنى ارىپتەستەرىمىزبەن نارەستەنى كورۋگە بارامىز»، - دەدى پوليتسيا قىزمەتكەرى.