ۇلتتىق بانك تەلەفون ءنومىرى ارقىلى تولەم جۇرگىزۋ جۇيەسىن ىسكە قوستى
ۇلتتىق بانك مالىمەتىنشە، سەرۆيس ۇيالى تەلەفون نومىرىمەن ءتۇرلى بانكتەردىڭ كليەنتتەرى اراسىندا جانە 24/7 رەجىمىندە تاۋلىكتىڭ كەز كەلگەن ۋاقىتىندا ۇلتتىق ۆاليۋتامەن اقشا اۋدارۋعا مۇمكىندىك بەرەدى. ول ءۇشىن اقشا جونەلتۋشىنىڭ موبيلدىك قوسىمشادا نەمەسە ءوزىنىڭ جۇيەگە قاتىسۋشى بانكىنىڭ ينتەرنەت بانكينگ جۇيەسىندە اقشا الۋشىنىڭ موبيلدىك تەلەفونىنىڭ ءنومىرىن، اۋدارىلاتىن اقشا سوماسىن جانە اقشا الۋشىنىڭ بانكىن ەنگىزۋى قاجەت. الۋشىعا ونىڭ جۇيەگە قاتىسۋشى بانكتەگى شوتىنا اقشا لەزدە ەسەپتەلەدى.
جۇيەدە بانكتىڭ شوتى، تولەم كارتاسىنىڭ جانە ەلەكتروندىق اقشانى پايدالانۋ سياقتى اقى تولەۋدىڭ جانە بانكتەر كليەنتتەرىنىڭ تاراپىنان اۋدارىمدى الۋىنىڭ ءتۇرلى قۇرالدارى بار. ءبىر ترانزاكتسيانىڭ ەڭ جوعارى ءليميتى 500 مىڭ تەڭگەنى قۇرايدى. قاتىسۋشى بانكتەر ءۇشىن جۇيەدە ترانزاكتسيالارعا قىزمەت كورسەتۋ ءتاريفى ترانزاكتسيا سوماسىنا قاراماستان ءبىر تولەم (اۋدارىم) ءۇشىن 1 تەڭگەدەن از بولادى.
تاجىريبەلىك- ونەركاسىپتىك پايدالانۋ اياسىندا جۇيەنىڭ العاشقى قاتىسۋشىلارى «بانك سەنتركرەديت» ا ق جانە «Altyn Bank» ا ق (China CITIC Bank Corporation Limited ە ب) بولىپ تابىلادى. باسقا دا ءبىرقاتار بانكتەر جۇيەگە قوسىلۋ ساتىسىندا.
«جۇيەدە كورسەتىلەتىن قىزمەتتەردى كەزەڭ- كەزەڭىمەن دامىتۋ جوسپارلانىپ وتىر. ءبىرىنشى كەزەڭدە جەكە تۇلعالار اراسىنداعى اۋدارىمدار (P2P- اۋدارىمدار) ، كەلەسى كەزەڭدەردە زاڭدى تۇلعالاردىڭ پايداسىنا، ونىڭ ىشىندە QR- كودتاردى پايدالانا وتىرىپ جۇرگىزىلەتىن تولەمدەر، سۇراتۋ بويىنشا تولەمدەر جانە باسقا دا تولەم تۇرلەرى قولجەتىمدى بولادى. قازاقستاندا مەزەتتىك تولەمدەر جۇرگىزۋ جۇيەسىن ەنگىزۋ پايدالانىلاتىن تولەم قۇرالىنا (بانكتىك شوتتار، تولەم كارتوچكاسى، ەلەكتروندىق ءاميان) جانە قىزمەت كورسەتەتىن بانككە قاراماستان ءتۇرلى قاشىقتىقتان قول جەتكىزۋ ارنالارى ارقىلى قولجەتىمدى، حالىققا جانە بيزنەس سۋبەكتىلەرىنە قولايلى، جىلدام، سەنىمدى جانە ارزان تولەم قىزمەتىن كورسەتۋگە باعىتتالعان» ، - دەپ اتاپ وتەدى ۇلتتىق بانك باسپا ءسوز قىزمەتى.
