قازاقستاندا دارىگەرگە كەش جۇگىنگەندەر جازالانۋى مۇمكىن
بۇل تۋرالى ق ر دەنساۋلىق ساقتاۋ ءمينيسترى ەلجان ءبىرتانوۆ استانادا «حالىق دەنساۋلىعى جانە دەنساۋلىق ساقتاۋ جۇيەسى» تۋرالى جاڭا كودەكس جوباسىن تالقىلاۋ كەزىندە مالىمدەدى.
«بۇل باستامانى بارلىعى قولدايدى دەپ ۇمىتتەنەمىن. ادامعا ءوزىنىڭ جانە جاقىندارىنىڭ، بالالارىنىڭ دەنساۋلىعى ءۇشىن جاۋاپكەرشىلىك ارتىلۋى ءتيىس. ءبىرىنشى كەزەكتە، بالا دەنساۋلىعىنداعى اتا- انانىڭ جاۋاپكەرشىلىگىن ارتتىرۋ، جۇكتىلىك پەن بوسانۋدا دارىگەرگە كەش جۇگىنگەن، ماماندار كەڭەسىنە قۇلاق اسپاعان انالارعا، سكرينينگتەن، ۆاكسيناتسيادان باس تارتقاندارعا قولدانىلاتىن شارالاردى ايتۋىمىز كەرەك»، - دەدى مينيستر.
ونىڭ ايتۋىنشا، مۇنداي جاۋاپكەرشىلىك شارالارى قابىلدانسا دا، ناۋقاستار تەگىن مەديتسينالىق جاردەمدى ەش كەدەرگىسىز الاتىن بولادى. سەبەبى، بارلىق ازاماتتار ۇكىمەت بەلگىلەگەن كولەمدەگى جانە الەۋمەتتىك مەديتسينالىق ساقتاندىرۋ اياسىنداعى تەگىن مەديتسينالىق كومەكتى الۋعا قۇقىلى.
«كوپتەگەن جاعدايدا ءبىز ازاماتتاردىڭ ءوزىنىڭ نەمەسە بالالارىنىڭ دەنساۋلىعىنا نەمقۇرايلى قاراۋىنان ەكونوميكالىق، الەۋمەتتىك جانە مورالدىق شىعىنعا ۇشىرايمىز. سوندىقتان، تالقىلاۋعا شىعارىپ وتىرعان بۇل باستامالار جالپى تاسىلدەر بولىپ سانالادى. اكىمشىلىك جاۋاپكەرشىلىك، ونىڭ تۇرلەرى، سالىناتىن ايىپپۇلدار ازىرگە انىقتالعان جوق»، - دەپ ءوز ءسوزىن تولىقتىردى ءبىرتانوۆ.
مينيستر مۇنداي جاۋاپكەرشىلىك شارالارىنىڭ حالىقارالىق تاجىريبەدە بار ەكەنىن جەتكىزدى.
«ءبىرقاتار ەلدەردە اۋرۋدىڭ الدىن الۋ بويىنشا سكرينينگتىك تەكسەرۋدەن ۋاقىتىندا وتپەگەندەرگە ايىپپۇل سالىنادى. ءبىزدىڭ زاڭنامادا وسى تەكتەس جايتتار بار - ءتۇپتىڭ تۇبىندە ءبىر تاراپ جاۋاپتى بولادى. مەديتسينالىق ساقتاندىرۋ دا - ورتاق جاۋاپكەرشىلىكتىڭ ءبىر ءتۇرى. وكىنىشكە قاراي، بىزدە ول دامىماعان. ماسەلەن، ۆيزا تالاپ ەتىلمەيتىن ەلدەرگە باراردا ەرىكتى جەكە ساقتاندىرۋ جاساتۋدى ۇسىنامىز. ماسەلەن، تۇركياعا باراتىن قازاقستاندىقتاردىڭ ساقتاندىرۋى بولۋى قاجەت»، - دەدى ول.
ءبىرتانوۆتىڭ ايتۋىنشا، كودەكس جوباسى شامامەن جەلتوقسان ايىندا ۇكىمەتكە، 2019 -جىلدىڭ العاشقى جارتىجىلدىعىندا - پارلامەنتكە جىبەرىلەدى. سونىمەن بىرگە، مينيستر كودەكستى ازىرلەۋگە مەديتسينا قىزمەتكەرلەرىن عانا ەمەس، تۇتاس قوعامدى، بيزنەستى جانە ۇكىمەتتىك ەمەس ۇيىمداردى بەلسەندى قاتىسۋعا شاقىردى.
اۆتور: ايجان سەرىكجان قىزى
