قازاق جىلقىسىنىڭ قۇيرىق قىلى ءسان يندۋسترياسىندا قولدانىلماق
امەريكادان الماتى وڭىرىنە كەلگەن كاسىپكەر اشوك جالاني جىلقى قىلىنىڭ ساپاسى وتە مىقتى ەكەنىن ايتۋدا. بولاشاقتا ول ءبىزدىڭ ەلدە كاسىپورىن اشۋدى دا جوسپارلاپ وتىر.
اشوك جالاني ءسان يندۋسترياسىنا قاجەتتى بۇيىمدار شىعارۋمەن 20 جىلدان بەرى اينالىسادى. جىلقىنىڭ قىلىنان سكريپكا، ۆيولونچەلدىڭ ىسقىسىمەن قاتار، ادەمى كىرپىك پەن پاريك، سۋرەتشىلەر مەن ۆيزاجيستەردىڭ قىلقالامىن، ءتىپتى ءتىس شەتكاسىن جاسايتىنىن ايتادى.
«قازاقستاندا شامامەن 2 ميلليونعا جۋىق جىلقى بار ەكەن. مەنىڭ بولجامىم بويىنشا، ونىڭ 10 پايىزعا جۋىعى اقبوز اتتار. ءبىزدى قىزىقتىراتىنى دا وسى جىلقىلار» ، - دەيدى جالاني.
كاسىپكەر شيكىزاتتىڭ ءار كەلىسىن 50 مىڭ تەڭگەگە باعالاپ وتىر. ءبىراق قوي قىرىققانى بولماسا، جىلقىنىڭ قۇيرىق قىلىن ساتىپ كورمەگەن جەرگىلىكتى فەرمەرلەر شەتەلدىك ازاماتتىڭ باستاماسىنا جاتىرقاي قاراپ وتىرعانى بار.
«ءار جىلقىدان قۇيرىعىنان 200 گرامم قىلى كەسىلىپ الىنادى. 1 مەتردەي بولۋى كەرەك. جىلقىنى تۇلداپ المايدى. قۇيىمشاق ومىرتقاسى بىتكەن جەردەن 1 ميلليمەتر تومەن تۇسىرەدى. سودان كەيىن سونىڭ ۇستىنەن كەسەدى. جۋىپ وتكىزسە قۇنى ءتىپتى ارتادى» ، - دەيدى جىلقىتانۋشى، پروفەسسور قايرات يسحان.
اشوك جالاني بۇعان دەيىن موڭعوليا مەن قىتايدا قابىلداۋ ورىندارىن اشقان. ءبىراق ولاردىڭ ساپاسى تومەن ەكەندىگىن ايتۋدا.
«العاشقى ۋاقىتتا ايىنا 100 كەلىدەن السام دەگەن ويىم بار. جاقىن كۇندەرى اقتوبە، اقمولا، قوستاناي وبلىستارىن ارالاپ، سونداعى فەرمەرلەرمەن كەزدەسۋدى جوسپارلاپ وتىرمىن. شيكىزات جيناۋ ماسەلەسى جولعا قويىلسا، وڭدەيتىن كاسىپورىن اشۋعا دا بولار ەدى» ، - دەپ اتاپ ءوتتى امەريكالىق كاسىپكەر.
ال اگرارلىق ۋنيۆەرسيتەت عالىمدارىنىڭ ايتۋىنشا، بۇل جاڭعىرتىلاتىن تابىس كوزى. سەبەبى جىلقىنىڭ قۇيرىق قىلى 1,5-2 جىلدا قايتا قالپىنا كەلەدى.
