ەكسپوعا كەلگەن كونگو ازاماتشاسى ەلىنە قايتا الماي ءجۇر
ءمالىم بولعانداي، مونيكا قازاقستانعا بىلتىر ەكسپو كورمەسىنە كەلگەن. وسىندا ەر ازاماتپەن تانىسىپ، ءبىراز ۋاقىتتان كەيىن ونىمەن قارىم-قاتىناسىن ۇزگەن. قازىر قولىندا كىشكەنتاي ءسابيى بار. ال ۆيزا مەرزىمىن ۇزارتۋ كەرەكتىگىن بىلمەگەن. وسىلايشا، قازىر ول ءۇي-كۇيسىز قالىپ وتىر. ونىڭ ۇستىنە، كونگولىق ازاماتشانىڭ تەك فرانسۋز تىلىندە سويلەۋى ونىمەن تىلدەسۋدى قيىنعا سوقتىرۋدا.
كامەلەتتىك جاسقا تولماعاندار جونىندەگى ينسپەكتسيا مونيكانى الەۋمەتتىك-قۇقىقتىق قورعاۋ ورتالىعىنا جىبەرگەن. ولار ءسابيدىڭ ومىرگە كەلۋىنە كومەكتەسكەن.
«ەگەر ميگراتسيالىق پوليتسيا ونى ۆيزالىق رەجيمدى بۇزعانى ءۇشىن ەلدەن كەتۋگە ماجبۇرلەسە، ونىڭ جولاقىسىن ەشكىم دە وتەي المايدى. بۇل ۇلكەن قاراجات، ال ازاماتشانىڭ ءبىر تيىنى دا جوق. ول قازاقستاندا قالۋعا كومەك سۇراپ وتىر. مۇنىڭ جولى بار. ءبىرى - ىقتيارحات الۋ. الايدا ونىڭ ەسەپشوتىندا 3 ميلليون تەڭگەسى بولۋى ءتيىس. نە بوسقىن مارتەبەسىن الۋ. بۇل دا كۇردەلى ماسەلە»، - دەيدى قور ديرەكتورى اننا رىل.
