وسكەمەندە «التاي - تۇركى الەمىنىڭ التىن بەسىگى» اتتى حالىقارالىق كونفەرەنسيا ءوتىپ جاتىر
ورتالىق مادەنيەت سارايىندا ءوتىپ جاتقان شاراعا وبلىس اكىمى دانيال احمەتوۆ، قازاقستان رەسپۋبليكاسىنىڭ پرەزيدەنت اكىمشىلىگىنىڭ ىشكى ساياسات ءبولىمىنىڭ مەڭگەرۋشىسى ايدا بالايەۆا، مادەنيەت جانە سپورت مينيسترلىگىنىڭ جاۋاپتى حاتشىسى قۋاتجان ۋاليەۆ، «تۇركسوي» حالىقارالىق ۇيىمىنىڭ باس حاتشىسى دۇيسەن قاسەيىنوۆ، اكادەميك عاريفوللا ەسىم، تۇركولوگ عالىم قارجاۋباي سارتقوجا ۇلى باستاعان مارتەبەلى مەيماندار مەن شەتەلدىك عالىمدار ارنايى شاقىرىلعان.
اۋەلى قوناقتارعا «التىن ادام» دەگەن تاقىرىپپەن سوڭعى ارحەولوگيالىق قازبالاردىڭ ناتيجەلەرى تانىستىرىلىپ، شىعىستىڭ كيەلى ورىندارى تۋرالى كورمە ۇسىنىلدى.
پلەنارلىق وتىرىستا شىعىس قازاقستان اۋماعىندا زەرتەۋ جۇرگىزىپ جاتقان ارحەولوگتار زەينوللا ساماشيەۆ، ابدەش تولەۋبەكوۆ جانە كارل بايپاقوۆ ۇشتىگى عىلىمي باياندامالار وقيدى دەپ كۇتىلۋدە. سونداي-اق، چەحيا، گەرمانيا، تۇركيا جانە فرانسيا عالىمدارى تۇركى الەمىنىڭ التايدان باستاۋ العان ۇلى وركەنيەتى جايىندا اسا قۇندى عىلىمي مالىمدەمەلەر جاساماق.
كونفەرەنسيانىڭ نەگىزگى بولىمىنەن كەيىن قاتىسۋشىلارعا وبلىستىق تاريحي- ولكەتانۋ مۋزەيىندە «بابالار التىنى» دەگەن تاقىرىپپەن تاعى ءبىر كورمە ۇسىنىلادى. مۇندا ارحەولوگيانى دامىتۋدىڭ وڭىرلىك باعدارلاماسى اياسىندا سوڭعى 3 جىلدا تابىلعان 19 مىڭ جادىگەردىڭ ەڭ قۇندى دەگەندەرى كورسەتىلەتىن بولادى. كونفەرەنسيا قوناقتارى شىلىكتىدەن تابىلعان سوڭعى «التىن ادامنىڭ» جاڭعىرتىلعان كوشىرمەسىن وسى كورمەدە ءوز كوزدەرىمەن كورۋگە مۇمكىندىك الادى.
وسى كورمەنىڭ كەڭەيتىلگەن نۇسقاسى جۋىقتا ەۋروپا ەلدەرىنىڭ بىرىندە «دالا امىرشىلەرىنىڭ التىنى» دەگەن اتپەن ءوتۋى مۇمكىن.
مەيماندارعا 46№ مەكتەپتىڭ بازاسىندا «مەنىڭ مەكتەبىم» اكسياسى بويىنشا نازاربايەۆ زياتكەرلىك مەكتەبىنىڭ ۇلگىسىندە تولىق جابدىقتالعان فيزيكا، حيميا، بيولوگيا جانە روبوت تەحنيكاسى سىنىپتارى تانىستىرىلادى. كونفەرەنسيانى وبلىستىق دراما تەاتردا وتەتىن Ⅲحالىقارالىق «اق ەرتىس» كلاسسيكالىق مۋزىكا فەستيۆالى تۇيىندەيدى.
