ازيادا جۇلدەگەرلەرىنە قانشا سىياقى بەرىلدى؟
ق ر ۇلتتىق وليمپيادالىق كوميتەنىڭ حابارلاۋىنشا، سالتاناتتى شاراعا قازاقستان ۇلتتىق وليمپيادالىق كوميتەتىنىڭ باس حاتشىسى دانيار ابۋلگازين قاتىستى.
قازاقستان رەسپۋبليكاسى ۇكىمەتىنىڭ قاۋلىسىنا سايكەس، ازيا ويىندارىنىڭ چەمپيوندارى مەن جۇلدەگەرلەرىنە ارنايى سىياقى بەكىتىلدى. التىن جۇلدە يەگەرلەرىنە 10 مىڭ، كۇمىس جۇلدەگەرلەرگە 5 مىڭ، قولا مەدال يەگەرلەرىنە 3 مىڭ ا ق ش دوللارى كولەمىندە سىياقى تارتۋ ەتىلدى.
«قازاقستان سپورتشىلارى دجاكارتاداعى جازعى ازيا ويىندارىنا قاتىسىپ، جالپى ەسەبى 76 مەدال جەڭىپ الدى. قۇرلىق دوداسىندا سپورتشىلارىمىز ەل نامىسىن ابىرويمەن قورعاپ، وليمپيادالىق سپورت تۇرلەرىنەن جاقسى ناتيجە كورسەتتى. كەيبىر ءۇمىت ەتكەن سپورتشىلارىمىزدىڭ ۇدەدەن شىقپاعان ساتتەرى دە كەزدەستى. ءبىراق بۇل - سپورت، ەڭ باستىسى، توكيوداعى جازعى وليمپيادا ويىندارىندا ساتتىلىك پەن جەڭىس تىلەيمىز. كەلەسى جىلدىڭ 1- قاڭتارىنان باستاپ ۇلتتىق قۇراما كوماندا باس باپكەرلەرىنىڭ ايلىعى ەكى ەسەگە كوبەيتىلەدى. سونىمەن قاتار، ۇ و ك سپورتشىلاردىڭ توكيو وليمپياداسىنا دايىندىعىن موينىنا الىپ، اتلەتتەر الاڭسىز دايىندالۋى ءۇشىن بار جاعدايدى جاسايدى»، - دەدى قازاقستان ۇ و ك باس حاتشىسى دانيار ابۋلگازين.
سپورتشىلار اتىنان كاراتەدەن ازيادا چەمپيونى اتانعان گۋزاليا عافۋروۆا مەن شپاگاشى دميتري الەكسانين ءسوز الدى.
«ازيا ويىندارىنا قارقىندى جاتتىعۋ جۇرگىزىپ، ۇلكەن دايىندىقپەن اتتاندىق. سول ارالىقتا ءبىزدى قولداعان باپكەرلەرگە، جانكۇيەرلەرگە جانە ۇلتتىق وليمپيادا كوميتەتىنە كوپ راحمەت! ازيادادا قازاقستاننىڭ العاشقى التىنىن يەلەنىپ، قالعان سپورتشىلارىمىزعا جول اشقانىما قۋانىشتىمىن»، - دەدى الەكسانين.
ويىن قورىتىندىسى بويىنشا قازاقستان سپورتشىلارى 24 وليمپيادالىق جانە وليمپيادا باعدارلاماسىنا ەنبەگەن 3 سپورت تۇرىنەن (دجيۋ دجيتسۋ، سامبو، كۋراش) 15 التىن، 17 كۇمىس جانە 44 مەدال يەلەنىپ، جالپى ەسەپتە 9-ورىننان كورىندى. اتلەتتەرىمىز 24 وليمپيادالىق سپورت تۇرىنەن جۇلدە الدى. ازيادا تاريحىندا تۇڭعىش رەت شپاگادا سەمسەرلەسۋدەن جەكەلەي سىندا مەدالعا يە بولدىق (د. الەكسانين، التىن مەدال). سونىمەن قاتار، ەسۋ سلالومى (ا. كۋليكوۆ، قولا) ، باتۋتتا سەكىرۋ (پ. الييەۆ، قولا) جانە ماۋنتينبايكتان (ك. كازانتسيەۆ، قولا) العاش رەت ازيا ويىندارىنان جۇلدەگە قول جەتكىزدىك. ويىن باعدارلاماسىنا العاش رەت ەنگەن دزيۋدودان كوماندالىق ارالاس سىندا ءبىزدىڭ كوماندا كۇمىس جۇلدەگەر اتاندى. سەگىز جىلدىق ۇزىلىستەن سوڭ جۇزۋدەن كوماندالىق ەستافەتادا قولا مەدال يەلەنىپ، كوركەم گيمناستيكادان قۇرلىق ۇزدىگى اتاعىن قايتارىپ الدىق. نەبارى 16 جاستاعى گيمناستارىمىز ازيادانى باعىندىرعان بولاتىن.
جالپى العاندا، ازيا ويىندارىندا 30 سپورتشىمىز جەڭىمپاز اتاندى. 46 سپورتشى كۇمىس، 66 سپورتشى قولا جۇلدەگەر. كوماندالىق سپورت تۇرلەرىن قوسا ەسەپتەگەندە (142) ءاربىر ءۇشىنشى قازاقستاندىق سپورتشى ازيادا مەدالىن جەڭىپ الدى. 17 كوماندا ازياداعا تولىقتاي جاڭارتىلعان قۇراممەن قاتىستى.
ايتا كەتۋ كەرەك، قازاقستان كومانداسىنداعى سپورتشىلاردىڭ باسىم بولىگى ازيا ويىندارىنا العاش رەت قاتىسىپ وتىر.
اۆتور: كۇنسۇلتان وتارباي
