ەلباسى قاراعاندىنى دامىتۋدىڭ ۇزاق مەرزىمدى ستراتەگياسىن ازىرلەۋدى تاپسىردى
قازاقستان پرەزيدەنتى وبلىستىڭ ەتنو-مادەني بىرلەستىكتەرىنىڭ جۇمىسىمەن تانىسقاننان كەيىن، وڭىردەگى جۇرتشىلىق وكىلدەرىمەن كەزدەستى.
مەملەكەت باسشىسى وبلىستىڭ ەكونوميكالىق دامۋ كورسەتكىشتەرىنىڭ وڭ قارقىنىن ايرىقشا اتاپ ءوتتى.
«بەس جىل ىشىندە 1,7 ميلليون شارشى مەتر تۇرعىن ءۇي پايدالانۋعا بەرىلدى. تۇرعىن ءۇي قۇرىلىسىنىڭ قارقىنى جونىنەن بۇل ءوڭىر رەسپۋبليكادا ءتورتىنشى ورىندا»، - دەدى نۇرسۇلتان نازاربايەۆ.
قازاقستان پرەزيدەنتى قاراعاندى ءوڭىرىنىڭ ەلىمىزدەگى ەڭ ۋربانيزاتسيالانعان ايماق ەكەنىن ايتىپ، وبلىستاعى بارلىق ەلدى- مەكەندە الەۋمەتتىك ينفراقۇرىلىمدى ىلگەرىلەتۋدىڭ ماڭىزدىلىعىن اتاپ ءوتتى.
مەملەكەت باسشىسى ەلىمىزدىڭ كولىك-ترانزيت الەۋەتىن پايدالانۋعا جانە تۇرعىنداردىڭ ءال-اۋقاتىن ارتتىرۋعا باعىتتالعان ستراتەگيالىق دامۋ باعدارلامالارىن ودان ءارى ىسكە اسىرۋ ماسەلەلەرىنە ەرەكشە نازار اۋداردى.
ەلباسى قاراعاندى وبلىسى اكىمىنىڭ بايانداماسىن تىڭداپ، جۇرتشىلىق وكىلدەرىمەن اڭگىمەلەسكەن سوڭ، ءوڭىردىڭ ەكونوميكالىق ءوسىمىن ودان ءارى قامتاماسىز ەتۋ جونىندەگى ءبىرقاتار باستى مىندەتتەردى شەشۋ قاجەتتىگىن ايتتى.
«بۇل وبلىستا ارنايى ەكونوميكالىق ايماق قۇرىلعان. بۇگىندە مۇندا بارلىعى 15 كاسىپورىن تىركەلسە، سونىڭ تەك التاۋى عانا جۇمىس ىستەپ تۇر. اكىمدىككە ارنايى ەكونوميكالىق ايماقتىڭ الەۋەتىن جانداندىرۋ جونىندە ناقتى شارالار ازىرلەۋدى تاپسىرامىن. ءىرى ينۆەستورلاردى قۇرىلىس، حيميا جانە مەديتسينا يندۋسترياسى، سونداي-اق مەتالل وڭدەۋ سالالارىنا تارتۋ قاجەت»، - دەدى مەملەكەت باسشىسى.
سونىمەن قاتار، قازاقستان پرەزيدەنتى تۇرعىندارعا جاعداي جاساۋ جانە ولاردىڭ ءال-اۋقاتىن جاقسارتۋ ءۇشىن كاسىپورىنداردىڭ الەۋمەتتىك جاۋاپكەرشىلىگىن ارتتىرۋ قاجەتتىگى جونىندە ايتتى.
سونداي-اق، نۇرسۇلتان نازاربايەۆ نەعۇرلىم سۇرانىسقا يە ءارى يمپورتتالاتىن تاۋارلار ءوندىرۋ ءىسىن رەتتەپ، كورسەتىلەتىن قىزمەت ساپاسىن جاقسارتۋدى تاپسىردى.
«ءىرى 4 كاسىپورىندا يندۋستريا 4.0 ەلەمەنتتەرىن ەنگىزۋ جوسپارلانىپ وتىر، ال 2 كاسىپورىن «مودەلدى تسيفرلىق فابريكا» رەتىندە ايقىندالدى. روبوتتاندىرۋ، جاساندى ينلەللەكت، ونەركاسىپتىك ينتەرنەت كاسىپورىندارعا ەڭبەك ونىمدىلىگى مەن ونىمدەرىنىڭ باسەكەگە قابىلەتتىلىگىن ارتتىرۋعا مۇمكىندىك بەرەدى. بۇل جۇمىستار تۇراقتى جۇرگىزىلۋگە ءتيىس»، - دەدى ەلباسى.
سونىمەن بىرگە، قازاقستان پرەزيدەنتى كورسەتىلەتىن مەملەكەتتىك قىزمەتتەردى سيفرلاندىرۋ باعىتىنداعى جۇمىستاردى جانداندىرۋدى جانە قاراعاندى قالاسىن دامىتۋدىڭ ۇزاق مەرزىمدى ستراتەگياسى مەن ونى ىسكە اسىرۋ جونىندەگى جول كارتاسىن ازىرلەۋدى تاپسىردى.
نۇرسۇلتان نازاربايەۆ ەل ەكونوميكاسىنداعى بيزنەستىڭ ماڭىزدى ءرولىن اتاپ ءوتىپ، قاراعاندى وبلىسىندا بيزنەستى دامىتۋ كارتاسىن ازىرلەۋدى، ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى مەن 2020 -جىلعا ارنالعان بيزنەستىڭ جول كارتاسى اياسىندا تۇرعىنداردى كاسىپكەرلىككە بەلسەندى تارتۋدى تاپسىردى.
كەڭەس بارىسىندا مەملەكەت- جەكەشەلىك ارىپتەستىك فورماتىنداعى جاڭا جوبالار ازىرلەۋ جۇكتەلدى.
مەملەكەت باسشىسى «بەس الەۋمەتتىك باستامانى» ىسكە اسىرۋ ماسەلەلەرىن ارنايى اتاپ ءوتىپ، ونىڭ ودان ءارى ساپالى جۇزەگە اسىرىلۋىن قامتاماسىز ەتۋدى تاپسىردى. سونداي-اق، نۇرسۇلتان نازاربايەۆ جوعارى ءبىلىم بەرۋ، دەنساۋلىق ساقتاۋ، تۇرعىن ءۇي قۇرىلىسى جانە وبلىستىڭ تۋريستىك الەۋەتىن دامىتۋ ساپاسىنا قاتىستى پروبلەمالاردى شەشۋ جوسپارىنا توقتالدى.
سونىمەن قاتار، مەملەكەت باسشىسى اۋىل تۇرعىندارىن ساپالى اۋىز سۋمەن قامتاماسىز ەتۋ قاجەتتىگىن ايتتى.
باسقوسۋ بارىسىندا جىلۋمەن قامتۋ، وڭىردەگى ەكولوگيالىق قاۋىپسىزدىكتى قامتاماسىز ەتۋ جانە جاسىل تەحنولوگيانى ەنگىزۋ ماسەلەلەرىنە دە ەرەكشە نازار اۋدارىلدى.
«ءبىر جىلدا ونەركاسىپ كاسىپورىندارىنان اۋاعا 600 مىڭ تونناعا جۋىق زياندى زاتتار شىعارىلادى. بۇل - رەسپۋبليكانىڭ قورشاعان ورتاسىن لاستايتىن زاتتاردىڭ تورتتەن ءبىر بولىگى. اكىمدىككە ۇكىمەتپەن بىرلەسە وتىرىپ، وبلىستاعى ەكولوگيالىق جاعدايدى جاقسارتۋ جونىندە كەشەندى شارالار قابىلداۋدى تاپسىرامىن»، - دەدى قازاقستان پرەزيدەنتى.
جيىن سوڭىندا مەملەكەت باسشىسى حالىقتىڭ بىرلىگىن نىعايتۋ جولىنداعى ەلىمىزدىڭ جەتىستىكتەرىنە توقتالىپ، وبلىستى ودان ءارى دامىتۋ ءۇشىن مەملەكەتتىك باعدارلامالاردىڭ جۇزەگە اسىرىلۋىنىڭ ماڭىزى زور ەكەنىن ايتتى.
