قازاق سۋرەتشىسى ب ۇ ۇ مىنبەسىندە ءسوز سويلەيدى
«كارىپبەك كۇيىكوۆتى قازاقستانعا تانىستىرۋدىڭ قاجەتى جوق، ونى شەتەلدە دە ءبارى تانيدى»، - دەپ جازدى ءانۋار جايناقوۆ فەيسبۋكتەگى پاراقشاسىندا.
ونىڭ ايتۋىنشا، كارىپبەك كۇيىكوۆ ب ۇ ۇ جاڭالىقتار ستۋدياسى مەن Kyodo News جاپونيالىق اگەنتتىگىنىڭ جۋرناليستەرىنە بەرگەن سۇحباتىندا ءوز ءومىرى تۋرالى ايتتى.
«انام مەنى دۇنيەگە اكەلگەن كەزدە قولدارىمنىڭ جوق ەكەنىن ءبىلىپ، مەنىڭ جانىما ەكى كۇن بويى جاقىنداي الماپتى. دارىگەرلەر اتا-اناما ماعان ينەكتسيا سالىپ، ۇيىقتاتىپ تاستاۋدى ۇسىنعان. ءبىراق، اكەم قارسى بولىپ، انام ەكەۋمىزدى ۇيگە الىپ كەتىپتى... بالا كۇنىمدە بارلىق بالالارمەن بىردەي ەكەنىمدى دالەلدەگىم كەلىپ، ءوز-وزىممەن كوپ جۇمىس ىستەدىم»، - دەپ اتاپ ءوتتى كارىپبەك.
«6- قىركۇيەكتە جەرلەسىمىز نيۋ-يوركتە، ب ۇ ۇ باس مىنبەسىندە ءسوز سويلەپ، ءوز ءومىرى تۋرالى بارشا الەمگە ايتىپ بەرەدى»، - دەدى ا. جايناقوۆ.
ەلىمىزدىڭ باستاماسىمەن بەكىتىلگەن حالىقارالىق يادرولىق سىناقتارعا قارسى ءىس-قيمىل كۇنىنە وراي ب ۇ ۇ باس اسسامبلەياسىنىڭ ءبىرىنشى رەسمي وتىرىسى استانا ۋاقىتىمەن ساعات 20:00 گە جوسپارلانعان. ونى ب ۇ ۇ بارلىق رەسمي تىلدەرگە اۋدارماسىمەن ب ۇ ۇ سايتىندا تىكەلەي ەفيردەن تاماشالاۋعا بولادى.
