اشەكەي بۇيىمداردى كۇتۋ تۋرالى كەڭەستەر

استانا. قازاقپارات - زەرگەرلىك بۇيىمدار ءبىزدىڭ ەڭ سىرلاس ءارى جۇرەگىمىزگە ەڭ جاقىن اكسەسسۋارلار بولىپ تانىلادى.

اسا قىمبات زەرگەرلىك بۇيىمدارىڭىزعا دۇرىس كۇتىم جاساۋ - ونىڭ قىزمەت ەتۋ مەرزىمىن ۇزارتىپ، ۇزاق جىلدار بويى باستاپقى كۇيىن ساقتاۋعا مۇمكىندىك بەرەدى.

جارىق پەن جىلۋدان اباي بولىڭىز!

كۇن ساۋلەسىنىڭ تەرىمىزگە زيان تيگىزەتىنى سەكىلدى جارىق پەن جىلۋ دا باعالى تاستاردىڭ توزىمدىلىگى مەن تۇسىنە كەرى اسەرىن تيگىزۋى مۇمكىن. وسى ەكى فاكتوردىڭ قاي-قايسى دا شامادان تىس بولسا، وندا ول قۇرامىندا ماسەلەن كۇلگىنتاس، كۋنسيت، توپاز سىندى تاستارى بار اشەكەيلەرگە اسەرىن تيگىزەدى.

مارجان جانە ءپىل سۇيەگى سىندى وزگە دە بيازى ماتەريالدار جارىقتىڭ كۇشتى اسەرى سالدارىنان كۇڭگىرت تارتاتىن بولادى. وزگە تاستار، اسىرەسە كارىپتاس كەرىسىنشە، كۇننىڭ استىندا قالدىراتىن بولساڭىز، قوڭىرقاي تارتادى.

 شامادان تىس جىلۋ مەن تەمپەراتۋرانىڭ كۇرت اۋىتقۋىنىڭ تاستى بۇلدىرەتىندەي اسەرى بار. ويتكەنى، تاستان جاسالعان بۇيىمنىڭ ىلعالدىلىق پايىزى تومەندەيدى. ال تابيعي ىلعال - بۇل قىمبات اشەكەيلەر وزدەرىنىڭ سۇلۋلىعىن ساقتاۋ ءۇشىن قاجەت ەتەتىن دۇنيە. ماسەلەن، مارجان تاستار قۇرعاپ، جارىلىپ كەتەدى. ال جىلتىر تاستار قىرلارىنداعى ساۋلەلەردىڭ جىلتىراپ ويناۋىنان ايىرىلىپ قالاتىندىعىن ايتپاعاننىڭ وزىندە اقشىل نەمەسە قوڭىرقاي رەڭككە يە بولادى.

اشەكەي بۇيىمداردى حيميكاتتاردان اۋلاق ۇستاڭىز!

حيميالىق زاتتاردىڭ ءتيۋى قىمبات مەتالدارعا، اتاپ ايتقاندا التىنعا، كۇمىسكە نە پلاتيناعا زاقىم كەلتىرۋى نە ءتۇسىن كەتىرۋى ابدەن مۇمكىن. ءتىپتى شاشقا ارنالعان لاك، لوسون، ءاتىر سەكىلدى قاراپايىم سۇيىقتىقتاردىڭ قۇرامىندا حيميالىق زاتتار بولۋى مۇمكىن، بۇلار ءسىزدىڭ مارجان، اسىل تاستارىڭىز سەكىلدى (كوگىلدىر اقىق، مەرۋەرت) نازىك اشەكەيىڭىزدىڭ ءتۇسىن كەتىرۋى ىقتيمال.

سونىمەن قاتار حاۋىزدا سۋعا ءتۇسۋ ءۇشىن ساقينا، بىلەزىك، مونشاق نە سىرعالارىڭىزدى شەشىپ الۋىڭىزعا كەڭەس بەرىلەدى، ويتكەنى قوعامدىق ورىنداردىڭ سۋى قۇرامىندا حلور بار. ءدال وسى كەڭەس ءۇي تازالاۋعا دا تىكەلەي قاتىستى. ءۇي تازالاۋ قۇرالدارىنىڭ قۇرامىندا دا نازىك ءارى قىمبات باعالى دۇنيەلەرگە زيانىن تيگىزەتىن اممياك بار ەكەنىن ۇمىتپاڭىز.

ەرەكشە كۇتىم

كوپتەگەن ءتۇرلى- ءتۇستى تاستار ادەتتە انىقتىق پەن ءتۇر-ءتۇستى جاقسارتۋ ءۇشىن وڭدەلىپ جاتادى. بۇل وڭدەۋ بۋدان، ەرىتۋدەن، ۋلترا دىبىستىق تازالاۋدان تۇرۋى مۇمكىن. ءسىزدىڭ تاسىڭىزدىڭ وڭدەلگەندىگىن ءبىلۋ ارقىلى ونى كۇتۋدىڭ جولدارىن دا بىلەسىز. بۇل ءۇشىن سىزگە اشەكەيدى ساتىپ العان كەزدەگى GIA ەسەبى قاجەت، ول جەردە ءسىزدىڭ تاسىڭىز تۋرالى جانە ونى كۇتۋ ەرەجەلەرى جازىلادى.

ۋلترادىبىستىق تازالاۋ قۇرالدارىن پايدالانۋ ۇقىپتىلىعى

كاسىبي ۋلترا دىبىستىق تازالاۋ قۇرالىن 150 دوللار كولەمىندە ساتىپ الۋ مۇمكىن بولسا دا، ونى كەز كەلگەن ادام دۇرىس پايدالانا الماۋى مۇمكىن.

ۋلترا دىبىستىق تازالاۋ قۇرالدارىمەن تازالاۋعا جاتپايتىن اشەكەي بۇيىمدار مىنالار:

سىرت كەلبەتىندە بولىگى بار، ماي، شايىر نەمەسە اينەك ءتارىزدى ماتەريالدارمەن تولتىرىلعان باعالى تاستار؛

مارجان، مەرۋەرت، ءپىل سۇيەگى جانە كارىپتاس سەكىلدى ورگانيكالىق تاستار؛

پلاستيك نەمەسە بالاۋىز سياقتى تۇراقسىز زاتتارمەن بەكىتىلگەن اشەكەيلەر؛

تەرميالىق وڭدەۋگە ۇشىراعان كوپتەگەن اشەكەي تاستار. مەحانيمزمنەن تۋاتىن ءدىرىل تاستاردىڭ تۇتاستىعىن بۇزىپ جىبەرۋى مۇمكىن دەگەن قاۋىپ بار.

بۇل تازالاۋ ءتۇرىن كوبىنە-كوپ زەرگەرلىك سالونداعى ماماندارعا تاپسىرعان ورىندى، ولار تاستاردىڭ ءتۇرىن ءارى ولارمەن قالاي جۇمىس جاساۋ قاجەتتىگىن بىلەدى.

قاۋىپسىز ادىستەر تۋرالى

كوپشىلىك ءتۇرلى- ءتۇستى قىمبات تاستاردى جىلى سۋمەن، جۇمساق سابىنمەن جانە شوتكامەن تازالاۋعا بولادى (تازالاۋ قۇرالدارىنسىز). سونداي-اق ءتىس تازالاۋ قۇرالى مەن سۋدى، جۇمساق ماتانى پايدالانۋ دا ورىندى.

ەكىنشى جاعىنان، مارجان سەكىلدى نازىك تاستار تەز سىرىلىپ قالۋى مۇمكىن. مۇنداي كەزدەرى ماكياجعا ارنالعان قىلتاياقشانى جانە جىلى سابىن سۋدى پايدالانۋ قاجەت. مارجانداردى ءتىزىپ، كەبۋى ءۇشىن ماتانىڭ ۇستىنە ورنالاستىرىڭىز. ىلعالدى جىبەك ءجىپ سوزىلىپ، وزىنە كىردى جيناپ الۋى ىقتيمال، سوندىقتان ول كەپكەنشە قول تيگىزبەڭىز. ۇنەمى مويىنعا تاعاتىن مارجان تاستارىڭىزدىڭ ءجىبىن جىلىنا ءبىر رەت اۋىستىرىپ تۇرۋعا كەڭەس بەرىلەدى.

قالاي ساقتاعان دۇرىس

اشەكەي بۇيىمداردى ەشقاشان جاشىككە سالا سالۋعا بولمايدى، بۇل اشەكەيلەرگە سىزات تۇسىرەتىنى بەلگىلى.

مەرۋەرت پەن جىلتىر تاس اۋادان ىلعالدى سىڭىرەدى، سوندىقتان ولاردى سەيف سەكىلدى قۇرعاق ايماقتا ساقتاۋ دۇرىس ەمەس، ولارعا پايدادان گورى زيانىن تيگىزەدى.

ساياحاتتاۋعا شىققان كەزدەرى ءوز اشەكەي بۇيىمدارىڭىزدى قوبديشاعا نە ساندىقشاعا سالىپ ۇستاساڭىز، بۇل ولاردىڭ زاقىمدالۋىنا جول بەرمەيدى.

 كوپتەگەن زەرگەرلىك دۇكەندەر اشەكەي بۇيىمداردى بەلگىلى ءبىر كەزەڭ سايىن تەگىن تەكسەرىپ، تازالاپ بەرۋدى ۇسىنىپ جاتادى: اشەكەي بۇيىمداردى ءار التى اي سايىن تەكسەرتىپ، تازالاتىپ تۇرعان دۇرىس. ءبىرىنشى كەزەكتە كاسىبي داعدىسى بار، ادال زەرگەردى ىزدەستىرىڭىز.

 

دەرەككوز: www.zhenskoeschastie.com