باتىس قازاقستاندا اقىن عۇمار قاراشتىڭ كەسەنەسى اشىلدى
ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنا سايكەس «تۋعان جەر» باعدارلاماسى اياسىندا كەسەنە جانىبەك اۋدانى بورسى اۋىلىنان 12 شاقىرىم جەردە ورناتىلدى.
كەسەنەنىڭ اشىلۋ راسىمىنە قاتىسقان وبلىستىق ءماسليحات حاتشىسى مالىك قۇلشاردىڭ ايتۋىنشا، عۇمار قاراشتىڭ جەرلەنگەن ورنى قازاقستاننىڭ 100 كيەلى ورىندارىنىڭ قاتارىنا ەنگىزىلگەن بولاتىن. وسىعان وراي كەسەنە ورناتۋ قولعا الىنعان ەدى.
جالپى، وبلىس بويىنشا «رۋحاني جاڭعىرۋ» باعدارلاماسى اياسىندا كوپتەگەن جوبالار قولعا الىنىپ، جاڭادان الەۋمەتتىك-مادەني نىساندار بوي كوتەردى. سونىڭ ىشىندە عۇمار قاراشتىڭ كەسەنەسى ەرەكشە ورىن الادى.
قازاق حالقىنىڭ ازاتتىق الۋىن اڭساپ وتكەن عۇمار قاراش «كورەمىز بە؟» دەگەن ولەڭىندە سول قيلى زاماننىڭ وزىندە-اق: «جارىق جولعا باستاۋشىعا ەرەمىز بە،
اق جۇرەكتى شىن ەرلەرگە سەنەمىز بە؟
تازا قاندى، كىرسىز جاندى قازاق جۇرتى
ءوز الدىنا ەل بولعانىن كورەمىز بە؟
الدى-ارتىن مەيلىنشە بايقاپ الىپ،
توڭىرەكتە نە بار، نە جوق، كوزىن سالىپ،
ءوز تىزگىنىن قازاق ۇلى وزىنە الىپ،
ءوز الدىنا جۇرت بولعانىن كورەمىز بە؟» ، دەگەن بولاتىن.
بابامىزدىڭ سول ارمانى بۇگىندە تولىعىمەن ورىندالىپ وتىر.
جيىندا اۋدان اكىمى ازامات سافيماليەۆ كەسەنەنىڭ بوي كوتەرۋىنە اتسالىسقان ەل جاناشىرلارىنا ريزاشىلىعىن بىلدىرسە، وبلىستىق مادەنيەت باسقارماسىنىڭ باسشىسى قادىربولات مۇساعاليەۆ، عۇمارتانۋشىلار، تاريح عىلىمدارىنىڭ كانديداتى باقتىلى بورانبايەۆا، جۋرناليست قازىبەك قۇتتىمۇرات ۇلى جانە باسقالار اتالعان شارانىڭ ماڭىزدىلىعىن، عۇمار قاراشتىڭ ەسىمىن ماڭگى ەستە قالدىرۋ، ونىڭ باي مۇراسىن زەرتتەۋ جۇمىستارىنىڭ جالعاسا بەرەتىنىن اتاپ كورسەتتى.
عۇمار قاراش اتىنداعى قوردىڭ ءتوراعاسى احمەديار باتىرحانوۆ قۇرىلىس جۇمىستارىن اتقارعان ازاماتتارعا العىس حاتتار تابىس ەتتى.
