ءۇندىستاندا الەمدەگى ەڭ بيىك ءمۇسىن تۇرعىزىلىپ جاتىر

 استانا. قازاقپارات -ءۇندىستان ۇكىمەتى ۆاردورا قالاسىنىڭ ماڭىندا گۋدجارات شتاتىنداعى جاساندى كولگە ەلدىڭ ۇلت كوسەمدەرىنىڭ ءبىرى، قوعام قايراتكەرى -  ۆاللابحاي پاتەلدىڭ قۇرمەتىنە ارناپ ءمۇسىن تۇرعىزىپ جاتىر.

ونىڭ بيىكتىگى -  182 مەتر. استىنداعى تۇعىرتاسىمەن قوسا ەسەپتەگەندە بيىكتىگى 240 مەتردى قۇرايدى. بۇل نيۋ- يوركتاعى «ازاتتىق» مۇسىنىنەن ەكى ەسە بيىك بولسا، قازىرگى كۇندەگى ەڭ بيىك ءمۇسىن قىتايدىڭ حىنان پروۆينتسياسىنداعى 128 مەترلىك بۋددادان 54 مەتر بيىك بولادى. پاتەل 1875 -جىلى 31 - قازاندا ءۇندىستاننىڭ ناديااد قالاسىندا دۇنيەگە كەلدى. جوعارى مەكتەپتى بىتىرگەننەن كەيىن زاڭ فاكۋلتەتىن ءتامامداپ، قورعاۋشى بولىپ جۇمىس ىستەي باستادى. 1900 -جىلدان باستاپ 1910 -جىلعا دەيىن گودحرا مەن بالساد قالالارىندا قىلمىستىق ىستەر بويىنشا قورعاۋشى بولدى، وسى كەزەڭدە پاتەل ءۇندىستاننىڭ ەڭ تانىمال جانە تابىستى ادۆوكاتتارىنىڭ ءبىرى ەدى. 1910 -جىلى لوندونعا باردى. 1913 -جىلى ۆاللوحايما ءۇندىستانعا قايتىپ كەلىپ، احمەداباد قالاسىندا زاڭگەر قىزمەتىن اتقاردى.

ونىڭ تۇلعا بولىپ قالىپتاسۋىنا ماحاتما گانديدىڭ تيگىزگەن اسەرى وتە زور. پاتەل ماحاتمانىڭ ءۇندىستاننىڭ تاۋەلسىزدىككە جەتۋىنە دەگەن ۇمتىلىسىن قولدادى جانە گانديدىڭ ادال ءىزباسارى بولدى. اعىلشىنداردان ءۇندىستان تاۋەلسىزدىك العانان كەيىن ۆاللابحاي ۆيتسە- مينيستر قىزمەتىن اتقاردى. پاتەل ءۇندىستاننىڭ شەكارالارىن ساقتاپ قالۋ جولىندا ۇلكەن كۇش جۇمسادى. حالىقتى كۇشپەن، قارۋمەن ەمەس، تىنىش جولمەن بىرىكتىردى. ەلدىڭ الدىنداعى وسىنداي قىزمەتى ءۇشىن حالىق ونى «ساردار» (جەتەكشى، كوشباسشى) دەپ اتاپ كەتتى.

 ۆاللابحاي پاتەل 1950 -جىلى 15 - جەلتوقساندا بومبەيدە قايتىس بولعان. بۇل ءمۇسىننىڭ قۇرىلىسىنا ءۇندىستان ۇكىمەتى 430 ميلليون دوللار جۇمساعان. ءۇندىستاننىڭ پرەمەر- ءمينيسترى نارەندرا ءموديدىڭ ايتۋىنشا، ەسكەرتكىش ءۇندىستاننىڭ حالىقارالىق بەدەلىن ارتتىرىپ، تۋريستەردى گۋدجارات شتاتىنا تارتادى. ءنوديدىڭ ءوزى جوباعا 34 ميلليون دوللار قارجى بولگەن. قۇرىلىسقا 5700 توننا بولات پايدالانىلعان. مۇسىندە كورمەلەر زالى، مۇراجاي، 153 مەتر بيىكتىكتە تاماشالاۋ الاڭى بولادى.

ءمۇسىن جاعالاۋعا 3,5 شاقىرىم قاشىقتىقتا ورنالاسقان. جوبا اۆتورلارى «Michael Graves Architecture Design» كومپانياسى جەتەكشىلەرىنىڭ ايتۋىنشا، قۇرىلىستا كۇندىز- ءتۇنى 2400 جۇمىسشى تىنباي ەڭبەك ەتىپ جاتىر جانە بارلىعى ۋاقىتىلى اياقتالادى. ءمۇسىننىڭ سالتاناتتى اشىلۋ ءراسىمى 2018 -جىلدىڭ 31 - قازانىنا جوسپارلانعان.

massaget.kz