اتىراۋدا «بابالار ىزىمەن» حالىقارالىق جوباسى جۇزەگە اسىرىلماق

اتىراۋ. قازاقپارات - اتىراۋدا «بابالار ىزىمەن» حالىقارالىق جوباسىن جۇزەگە اسىرۋ جوسپارلانۋدا. اتالعان باستاما ەلباسىنىڭ «بولاشاققا باعدار: رۋحاني جاڭعىرۋ» ماقالاسىنىڭ «تۋعان جەر» باعىتى بويىنشا جۇزەگە اسادى، دەپ حابارلايدى قازاقپارات ءتىلشىسى.

پاتريوتتىق اۆتو-موتوشەرۋ باستاماسىن «Wheels Brothers MC Atyrau»  موتوكلۋبىنىڭ پرەزيدەنتى ولەگ شمال 23- تامىز كۇنى ەلباسىنىڭ اتىراۋ وبلىسىنا قىزمەتتىك ءىس ساپارى بارىسىنداعى كەزدەسۋ كەزىندە مالىمدەدى.

جوبا ماقساتى تاۋەلسىز قازاقستاننىڭ رۋحاني بايلىعى، قازىرگى زامانعى دامۋى مەن مادەني-ەتنيكالىق بىرلىگىن ناسيحاتتاۋ.

«ءبىز جاڭا جىبەك جولىنىڭ قىتايدان باتىس ەۋروپاعا دەيىن، سارى تەڭىزدەن سولتۇستىك تەڭىزگە دەيىنگى ەڭ ۇزاق باعىتىن قامتۋدى جوسپارلاپ وتىرمىز. جولىمىز 12 مىڭ شاقىرىمدى قۇرايدى. ارينە، اۋقىمدىلىعى قاراجاتقا بايلانىستى، سوندىقتان سەرىكتەستىك پەن دەمەۋشىلىكتەن باس تارتپايمىز. بۇل اۆتو-موتوشەرۋ وداققا مۇشە ەلدەر اراسىندا العاش رەت وتكىزىلەدى. سوندىقتان، ءبىز قاتىسۋشىلار جيناپ، كولىكتى جابدىقتاپ، ءبىز تىڭعىلىقتى دايىندالعىمىز كەلەدى. تەك، بۇل جوبامىز كەلەسى جىلى جۇزەگە اسادى. ناقتى ۋاقىتىن قازىر ايتا المايمىن. قاتىسۋشىلارعا قويىلاتىن تالاپتارعا كەلەتىن بولساق، ولار: فيزيكالىق تۇرعىدان كۇشتى بولۋ، ەكسترەمالدى موتوتۋريزمگە دەگەن قىزىعۋشىلىق، ءوز ەلىن ءسۇيۋ جانە ول تۋرالى جاقسى ءبىلۋ جانە تولىق بايلانىس ءۇشىن كەم دەگەندە ءبىر شەت ءتىلىن ءبىلۋ جەتكىلىكتى»، دەيدى ولەگ شمال.