ايەلدىڭ وتباسىنداعى نەگىزگى مىندەتتەرى

 استانا. قازاقپارات - «ۇيلەنۋ وڭاي، ءۇي بولۋ قيىن» دەيتىن قازاقپىز. الايدا بۇل ءسوزدىڭ استارىنا تەرەڭ ۇڭىلەر بولساق، دانا حالقىمىز بىزگە اقىل رەتىندە كوپ دۇنيەنى ەسكەرتىپ تۇرعانىن اڭعاراسىز.

سەبەبى وڭاي مەن قيىن، اۋىر مەن جەڭىل، اق پەن قارادان تۇراتىن ومىردە وتباسىن بەرىك، قارا شاڭىراقتى شايقالتپاي ۇستاۋ - ۇيلەنگەن ەكى جاستىڭ قولىندا ەكەنىن مەڭزەيدى. ەر مەن ايەلدىڭ تەڭ ەمەس ەكەنىن، وتباسىنداعى ايەل مەن ەردىڭ ءوز مىندەتتەرى بولاتىنىن ايتادى. نازىك جاندى جاراتىلىس يەسى ايەلدىڭ وتباسىنداعى مىندەتىن ساناۋعا كەلمەگەنىمەن، نەگىزگى 10 مىندەتىن اتاپ وتەيىك.

1. كۇيەۋىن سىپايى تۇردە شاقىرۋ. جۇبايىڭىزدى ءوز ەسىمىمەن اتاماي، ەركەلەتىپ نەمەسە وزىنە ۇنايتىن ەسىممەن اتاعانىڭىز دۇرىس. ايقايلاپ ەسىمىن ايتىپ شاقىرعاننان ءبىر اۋىز سىپايى شاقىرعانىڭىز، وتباسى بەرەكەسىن كىرگىزە تۇسپەك.

 2. جارىنىڭ الدىندا ءساندى شاش ۇلگىسىندە بولۋ. جۇمىستان شارشاپ كەلگەن ەرىڭىزگە ەنەرگيا كوزى بولا ءبىلىڭىز. ول ءسىزدىڭ ءجۇرىپ- تۇرىسىڭىزدان بولەك، سىرتقى سۇلۋ بەينەڭىزگە تىكەلەي بايلانىستى. ءسىزدىڭ شارشاڭقى ءجۇزىڭىز كۇيەڭىزدىڭ كوڭىل- كۇيىنە اسەر ەتۋى مۇمكىن.

 3. كوركەم مىنەز -  كوڭىل ايناسى. وتباسىنداعى ايەلدىڭ قاس- قاباعى ءۇي ءىشىنىڭ اۋراسىن ايتقىزباي- اق كورسەتىپ بەرە الادى. سول سەبەپتى ءسىزدىڭ كوركەم مىنەزىڭىز وتباسىندا ماڭىزدى رولگە يە ەكەنىن ءبىر ءسات تە ەستەن شىعارماعايسىز. جاي عانا ەرىڭىزدى جۇمىستان كۇلىپ قارسى الۋىڭىز بەن جىلى ءسوزىڭىز وسىعان مىسال بولماق.

 4. وتباسى زاڭىنا باعىنۋ. ءاربىر ءۇيدىڭ ءوز تالاپ- ءتارتىبى، وزىندىك ءبىر ەرەكشەلىكتەرى مەن قاعيدالارى بولادى. سول شەكارادان اسپاساڭىز بولدى.

 5. تۇرمىس قۇرعانعا دەيىنگى جاعدايدى ايتا بەرمەۋ. قىز بالاسى تۇرمىسقا شىقپاي تۇرىپ، «وتباسى» ، «اتا- ەنە» ، «بالا» ءسوزىنىڭ استارىنا تەرەڭ ءۇڭىلىپ، وتباسىن قۇرۋعا ىشتەي دايىندىعى بولۋى قاجەت. ەرىنىڭ وتباسىن جىلى قابىلداپ، ءبىرىنشى ورىندا اتا- اناسىنىڭ (اتا- ەنە) كوڭىلىنەن شىعىپ، رازىلىعىن الۋ قاجەت.

 6. تاپقان تابىسىن مىندەتسىنبەۋ. بۇگىندە وتباسى مەن جۇمىستى قاتار الىپ جۇرگەن نازىك جاندىلار قاتارى كوپ. سول سەبەپتى ەكەۋىنىڭ ءسىز ءۇشىن جەتەكشىسى قايسىسى ەكەنىن اجىراتا ءبىلىڭىز. باستى قۇندىلىعىڭىز وتباسى بولسا، جۇمىستى كومەكشىسى رەتىندە قاراستىرا ءبىلىڭىز.

 7. ەرىنىڭ دوستارىن قۇرمەتتەۋ. ايەل ادام كۇيەۋىنە دەگەن قۇرمەتىن كوپتەگەن ارەكەت ارقىلى كورسەتە الادى. سونىڭ ءبىرى -  جۇبايىڭىزدىڭ دوستارىن سىيلاپ، ۇيگە كەلگەن قوناققا قۇرمەتپەن قاراۋ.

 8. ۇنەمدەۋ. سۇيىكتىڭىز سۇرلىگىپ، اي بويى جۇمىس ىستەپ تاپقان تابىسىن ۇنەمدەي ءبىلىڭىز. ايلىقپەن كۇن كورەتىندەر ءبىر ايلىق قارجىنى تەك ەسەپپەن عانا جەتكىزەتىنىن ۇمىتپاڭىز.

 9. كۇيەۋىڭىز -  كارولىڭىز. ەشقاشان سۇيىكتىڭىزدى باسقالارمەن سالىستىرماڭىز. ەسىڭىزدە بولسىن، ەر ادام الدىنداعى كىشىپەيىلدىك ايەلدەرگە جاراسادى. ەگەر دە سالىستىرۋ قاجەت بولسا، الدىمەن ءوزىڭىزدى وزگەلەرمەن سالىستىرىپ كورىڭىز. جاي عانا ءۇي تازالىعىنان باستاپ، ءتاتتى تاعام ءپىسىرۋ، ت. ب. وسىنداي كوزگە كورىنبەس سالىستىرۋلار ءسىزدى ءوز ورنىڭىزعا قويادى.

 10. ايەل ادام بالامەن باقىتتى. ۇرپاق ءسۇيۋ، ارتىنا ۇرپاق قالدىرۋ وتباسىنىڭ باستى مىندەتى. ال ونى سانالى، تاربيەلى ۇرپاق ەتىپ شىعارۋ اتا- انا مىندەتى. «ايەل -  قىرىق شىراقتى» دەمەكشى وتباسىندا ايەل قاۋىمىنا ارتىلعان جاۋاپكەرشىلىك كوپ- اق. ال، ءسىز ءۇشىن ايەلدىڭ وتباسىنداعى نەگىزگى مىندەتى دەپ تاعى نەنى ايتار ەدىڭىز؟

 

Massaget.kz