دۇنيەجۇزىلىك كوشپەندىلەر ويىندارى: قازاق كوكپارشىلارى رەسەي كومانداسىمەن كەزدەسەدى
ايتا كەتسەك، بۇعان دەيىن ءبىرقاتار ب ا ق بەتتەرى مەن الەۋمەتتىك جەلىلەردە قىرعىز رەسپۋبليكاسىندا ءوتىپ جاتقان III دۇنيەجۇزىلىك كوشپەندىلەر ويىندارىندا كوكپاردان قازاقستان قۇراماسى جالعا ات الا الماۋى سەبەپتى ويىنعا قاتىسا المايتىنى تۋرالى اقپارات شىققان بولاتىن.
«كۇنى كەشە كوپتەگەن قازاقستاندىق جانە قىرعىزستاندىق ب ا ق كوكپاردان ۇلتتىق قۇرامانىڭ III بۇكىلالەمدىك كوشپەندىلەر ويىندارىنا قاتىسۋدان باس تارتقانى جونىندە اقپارات شىققان بولاتىن. ءبىزدىڭ تاراپتىڭ ۇيىمداستىرۋشىلارعا ويىننىڭ ەرەجەلەرى بويىنشا سۇراقتارى تۋىندادى. بۇگىنگى تاڭدا بارلىق ماسەلە شەشىلدى. ءبىزدىڭ كوماندا ويىندارعا قاتىسادى، ەشكىم ەشقايدا كەتكەن جوق. ەرتەڭ ۇلتتىق قۇراما رەسەيدىڭ كراسنويارسك ولكەسىنەن كەلگەن كوماندامەن كەزدەسەدى»، - دەدى ق ر مادەنيەت جانە سپورت مينيسترلىگىنىڭ سپورت جانە دەنە شىنىقتىرۋ ىستەرى كوميتەتىنىڭ باسپا ءسوز حاتشىسى راۋحان توعىمبايەۆا ءوزىنىڭ فەيسبۋك پاراقشاسىندا.
