نەكەگە دەيىن تالقىلانۋى ءتيىس تۇيتكىلدەر

 استانا. قازاقپارات - جىگىت پەن قىز ءبىر- بىرىمەن كوڭىل جاراستىرىپ، بولاشاقتى بىرگە جوسپارلاعان ساتتەن باستاپ نەكە تۋرالى ءسوز بولادى. الايدا نەكەگە وتىرعاننان كەيىن تالقىلانۋى كەش بولاتىن ماسەلەلەر بار.

بالا. ادامنىڭ ومىردەگى ەڭ باستى ميسسياسى ارتىنا ۇرپاق قالدىرۋ دەسەك تە، ومىرگە بالا اكەلگىم كەلمەيدى دەيتىن ادامدار دا كەزدەسەدى. بۇل كوپ جاعدايدا قازاققا جات قىلىق، ارينە. جىگىت پەن قىزدىڭ ءبىرى كوپ بالاسى بولۋىن قالايتىن، ءبىرى 1-2 بالانى جەتكىلىكتى سانايتىن بولۋى دا ىقتيمال. ءتىپتى قىز بالام بولماۋىن قالايمىن دەيتىن ادامدار دا كەزدەسەدى. بۇل تۇرعىدان ەرلى- زايىپتى بولار ادامداردىڭ پىكىرى تۋرا بىردەي بولماسا دا، ۇقساس بولعانى ابزال، ايتپەسە سوڭى داۋعا ۇلاۋى دا ىقتيمال.

ومىرگە كوزقاراس. ومىردە ءتۇرلى ادام بار. بىرەۋلەر ءتىپتى شۇكىرشىلىك ايتۋدىڭ ءوزىن ارتىق ساناۋى مۇمكىن. كەي جىگىتتەر بولاشاقتا ءوز ايەلى تولىقتاي جابىق كيىنگەنىن قالاسا، كەي قىزدار كيىنۋ ستيلىنە ەشكىمنىڭ ارالاسپاعانىن قالايدى. سوندىقتان بۇل ماسەلەنى دە ۇيلەنبەس بۇرىن شەشىپ العان دۇرىس.

ادالدىق. قوعامدا از- اق قالعان وسى ۇعىم تۋرالى دا ەكى جاقتىڭ كوزقاراسىن انىقتاپ العان ارتىق بولمايدى. كىمگە قانشالىقتى ماڭىزدى، كىم قانشالىقتى سەزىمگە ادال بولىپ، وتباسىن ساقتاپ قالۋ ءۇشىن بارىن سالا الادى. ەگەر بىرەۋى وپاسىزدىق جاساعان جاعدايدا ماسەلە قالاي شەشىلەدى، وسى سۇراقتىڭ بارلىعى تالقىلانۋى ءتيىس.

اقشا. ومىردە ودان دا ماڭىزدى نارسەلەر كوپ بولعانىمەن، نارىق زامانىندا ماحابباتتان دا اقشانى بيىك قوياتىندار سانى ارتقان. ءبىر وتباسىدا اقشانى اكەسى ۇستاسا، ەندى بىرەۋىندە اناسى ۇستايدى. مۇنى كورىپ وسكەن بالا ءوزىنىڭ دە بولاشاق وتباسىن سولاي ەلەستەتەدى، ياعني اقشانى قىزدىڭ وتباسىندا اناسى، ۇلدىڭ وتباسىندا اكەسى باسقارعان بولسا، بۇل جۇپتا تالاس تۋىنداۋى مۇمكىن. ال ەگەر وتباسىنىڭ بيۋدجەتى تولىقتاي جىگىتتىڭ اناسىنا تيەسىلى بولىپ، كەلىنى بارلىق تابىسىن ەنەسىنە تاپسىرىپ وتىرۋعا مىندەتتى بولسا، بۇرىن بار قاراجاتىن وزىنە عانا جۇمساپ داعدىلانعان ارۋ وعان كوندىگە قويۋى وڭاي ەمەس. مىنە، قاراجات ماسەلەسىن دە الدىن الا شەشىپ الۋدىڭ ماڭىزى وسىدان كورىنەدى.

 زياندى ادەتتەر. ىشىمدىككە، تەمەكىگە، ەسىرتكىگە كوزقاراسى قانداي؟ قۇمار ويىندار، كومپيۋتەرلىك ويىندارعا قالاي قارايدى؟ بۇل سۇراقتار دا ءبىرىنشى قويىلۋى ءتيىس ساۋالدار قاتارىنا جاتادى. وتباسىن ورتاسىنا تۇسىرەتىن سەبەپتەردىڭ ءبىرى وسى بولۋى دا مۇمكىن. قازىر وسى زياندى نارسەلەردى ءجيى تۇتىناتىن بولىپ، ۇيلەنگەن سوڭ نەمەسە بالالى بولعان سوڭ قويامىن دەسە، وعان سەنۋ بوس اۋرەشىلىك. قويعان جاعدايدا دا كەز كەلگەن ۋاقىتتا قايتا باستاۋىنا كۇمانىڭىز بولماسىن. بۇل كەمشىلىكتەرىنە كوز جۇما قاراي الامىن دەگەن جاعدايدا عانا قارىم قاتىناستى جالعاستىرۋعا بولادى.

Massaget.kz