وزبەكستان تۇركى كەڭەسىنە كىرە مە
«وزبەكستان تۇركى كەڭەسىنىڭ مۇشەسى ەمەس. الايدا وزبەك ەلىنىڭ باسشىلارى كوپتەن بەرى سامميتتەردىڭ جۇمىسىنا قاتىسىپ كەلەدى. ولار تۇركى تىلدەس ەلدەرىنىڭ دوستىعىن، قاشاندا ءوز باۋىرلارىن قولدايدى. جاقىن ارادا وزبەكستاننىڭ تۇركى كەڭەسىندەگى مۇشەلىگى راسىمدەلەدى دەپ سەنەمىز. ول ءۇشىن بارلىق العىشارتتار بار»، - دەدى ب. امىرەيەۆ تۇركى كەڭەسىنىڭ VI سامميتىنەن كەيىن جۋرناليستەرگە بەرگەن سۇحباتىندا.
ونىڭ ايتۋىنشا، بۇگىن ماجارستان تۇركى كەڭەسىنە باقىلاۋشى رەتىندە كىرۋگە ءوتىنىم بەردى. كەڭەس مۇشەلەرى ونى ءبىراۋىزدان قولدادى.
«وسىلايشا، بۇگىننەن باستاپ ماجارستان رەسمي تۇردە تۇركى كەڭەسىنىڭ باقىلاۋشىسى بولىپ تىركەلدى. ءبارىمىز جاقسى بىلەمىز، باۋىرلاس ماجار ەلى ءتۇپ- توركىنىمىز ۇلى دالادان باستاۋ الادى دەپ بىلەدى. ءبىز ولاردىڭ وسى ءبىر قۇلشىنىسىن تولىعىمەن قولدايمىز»، - دەپ اتاپ كورسەتتى ب. امىرەيەۆ.
ايتا كەتەيىك، بۇگىنگى سامميت كەزىندە باعدات امىرەيەۆتىڭ باس حاتشى قىزمەتىنە تاعايىندالعاندىعى تۋرالى حابارلاعان بولاتىنبىز.
اۆتور: ارمان اسقاروۆ
