تىرناقتان تامعان تابىس
تاپسىرىس تۇرلەرىنە قاراي كليەنتتىڭ ۇيىنە بارىپ قىزمەت كورسەتۋ نەمەسە ءوز ۇيىنەن ءبىر بۇرىش اشۋ، يا بولماسا، بىرنەشە سۇلۋلىق سالونىمەن كەلىسىپ، جۇمىس كەستەسىن رەتتەپ الۋ تابىس تابۋدا ۋاقىتتى ىڭعايلاۋ مەن باسقارۋعا كوپ مۇمكىندىك بەرەدى. سۇيرىك ساۋساق، كوركەم تىرناق - ءار ايەلدىڭ ايناسى بۇگىندە تىرناق كۇتىمىنە ءمان بەرمەيتىن قىز- كەلىنشەكتەر كەم دە كەم، ءتىپتى ىسكەرلىك سالاداعى ەر ازاماتتاردىڭ ءوزى مانيكيۋر شەبەرىنىڭ قىزمەتىنە جۇگىنىپ جاتادى.
مانيكيۋر جانە پەديكيۋر شەبەرلەرى ۇيدە دە، سالوندا دا جۇمىس ىستەي الادى. وسى ۇقساس، دەگەنمەن ءار ءتۇرلى ەكى سالانىڭ تيىمدىلىگى مەن تابىستىلىعى سوڭعى جىلدارى ارتپاسا، كەمىمەدى. تابىستىلىق شەبەرلىككە بايلانىستى. كاسىبي ماماننىڭ شەبەرلىگىنە كوز جەتكىزگەندەر تۇراقتى كليەنتكە اينالادى. وسى رەتتە ول ۇيدە قابىلداي ما، سالوندا جۇمىس ىستەي مە ماڭىزدى بولماسى انىق. تابىسىڭنىڭ جەمىسىڭ كور بۇل كاسىپتە سالوندا جۇمىس ىستەيتىن شەبەرلەر تابىستىڭ %50-60 ىن سولونعا تولەپ وتىرادى. جۇمىس ورنىن، قۇرال- سايمانداردى، جارىق پەن سۋدى قامتاماسىز ەتىپ وتىرعان جۇمىس بەرۋشىنىڭ شىعىنى. ال شەبەرلەر كورسەتىلەتىن قىزمەتتىڭ ءتۇرى مەن دەڭگەيىن ۇلعايتۋ ءۇشىن بىلىكتىلىكتى ارتتىرۋ كۋرستارىنىڭ شىعىنىن ءوز موينىنا الادى. ال ۇيدە جۇمىس ىستەيتىن شەبەرلەر جەكە كاسىپكەر رەتىندە بارلىق شىعىندى كوتەرەدى. قاجەتتى جابدىقتار مەن ماتەريالداردى الىپ، جۇمىس ورنىن رەتتەيدى. ءبىراق ءدال وسى ارەكەتى تابىستى بولادى دەپ بىردەن كەپىلدىك بەرىلمەيدى.
كليەنت بازاسىن قالىپتاستىرۋ، جارناما جاساۋ، بەدەل جيناۋ، سەنىمگە كىرۋگە ۋاقىت كەرەك. ال سەنىمدى دە شەبەر مامان اتانۋ ءۇشىن ىزدەنۋ، ءاردايىم بىلىكتىلىكتى ارتتىرۋ، وقۋ ماڭىزدى. ءدال وسى كاسىپتەن پايدا تۇسىرەم دەگەن جان وزىنەن دە، كليەنتتەن دە قاراجات ۇنەمدەمەيدى. بىلىكتىلىگىن شىڭداۋ ءۇشىن كۋرستارعا بارادى. مۇنىڭ ءوزى تەگىن ەمەس. قۇرال- سايماندار مەن بوياۋ، گەل، لاكتاردىڭ دا ساپالىسىن الادى. سونىمەن قاتار شەبەردىڭ دە قولى مەن تىرناعى كورگەن كوزگە سۇيكىمدى بولۋى ءتيىس. سۇيرىك ساۋساق، كوركەم تىرناق - كليەنتتىڭ عانا ەمەس، مانيكيۋر شەبەرىنىڭ دە ۆيزيت كارتاسى.
قاۋىپسىزدىك - تابىستىلىق كەپىلى ۇيدە جۇمىس ورنىن قۇرعان شەبەرلەر سانيتارلىق نورمالار مەن ءورت قاۋىپسىزدىگىن ساقتاۋ تالاپتارىن تۇتاستاي ورىنداۋى كەرەك. سەبەبى حيميالىق زاتتارمەن جۇمىس ىستەۋ كليەنتتىڭ دە، ءوزىنىڭ دە دەنساۋلىعىنا زيان كەلتىرمەي، قاندايدا ءبىر توتەنشە جاعدايدى تۋدىرماۋى ءتيىس. مۇنىمەن قوسا قۇرال- سايمانداردى زارارسىزداندىرۋ، دەنساۋلىققا زيان كەلتىرمەيتىندەي تازالىقتا ۇستاۋ - باستى مىندەت.
شەبەردىڭ جەكە باس گيگيەناسى مەن جۇمىس ورنىنىڭ تازالىعىنان باستاۋ الاتىن تالاپ سەنىمدىلىككە باستايتىن جول. كوپ رەتتىك پايدالانۋ قۇرالدارىن تازارتۋ، زارارسىزداندىرۋ جۇمىسى 3 كەزەڭنەن تۇرادى. ارنايى ەرىتىندىدە زارارسىزداندىرىپ، كەپتىرىلگەننەن كەيىن، ارنايى جابدىقتا ستەريلدەۋدەن وتەدى. قۇرال- سايماندى تازارتۋعا 1,5 ساعاتتاي ۋاقىت كەتەدى. سوندىقتان بىرنەشە قۇرال بولعانى ءتيىمدى. كليەنت كەلگەندە تازا، جۋىلعان، زارارسىزداندىرىلعان قۇرالدارى اشۋ، پايدالانۋ سەنىمدى ۇلعايتادى. تازا قۇرالداردى كورگەن كليەنت قاۋىپسىز جەردە كاسىبي ماماننىڭ الدىندا وتىرعانىنا كوڭىلى توق بولارى انىق. سۇلۋلىق يندۋسترياسىندا مانيكيۋر سالاسىنا سۇرانىس جوعارى. بۇعان سەبەپ باعاسىنىڭ قول جەتەرلىكتەي بولۋى. ارينە، قالالىق، اۋىلدىق جەرلەردە ءوڭىردىڭ الەۋمەتتىك- ەكونوميكالىق احۋالىنا قاراي باعا دا ءار ءتۇرلى. بۇل اۋا رايىنىڭ قۇبىلمالىعى، ماۋسىمدىق وزگەرۋ سىندى فورس- ماجورلىق جاعدايلار اسەر ەتپەيتىن قىزمەت ءتۇرى. سوندىقتان نارىققا كىرۋدە دە اسا ءبىر كوپ قارجىنى تالاپ ەتپەيدى.
يدەيانى جۇزەگە اسىرۋ جولدارى بۇگىندە ەلىمىزدە «ەڭبەك» ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 -جىلدارعا ارنالعان باعدارلاماسى جۇزەگە اسىرىلىپ وتىر. «اتامەكەن» ق ر ۇلتتىق كاسىپكەرلەر پالاتاسى اتالعان باعدارلاما اياسىندا «باستاۋ» جوباسىن قولعا العان. اۋىل- ايماقتارداعى جۇمىسسىز جانە ءوزىن- ءوزى جۇمىسپەن قامتىعان ازاماتتاردى كاسىپكەرلىك نەگىزدەرىنە باۋلىپ، بيزنەس- يدەيانى شىنايى جوباعا اينالدىرىپ، شاعىن نەسيە الۋدا سۇيەمەلدەۋ قىزمەتىن كورسەتىپ كەلەدى. اۋىلدىق جەردە ءبىلىم العان ازاماتتاردىڭ باسىم كوپشىلىگى بيزنەس- جوسپاردى مال جانە وسىمدىك شارۋاشىلىعىنا ارناسا، قىز- كەلىنشەكتەر جاعى قىزمەت كورسەتۋ سالاسىن تاڭداپ وتىر. ونىڭ ىشىندە سۇلۋلىق يندۋسترياسىنا كوڭىل بولگەندەرى دە بار. وسىلايشا از قاراجاتپەن تابىستى بيزنەسكە قادام جاساۋ زاڭداستىرىلعان جەكە كاسىپكەرلىك سانىن ارتتىرۋعا سەپ بولماق.
قارلىعا تەلمان
Massaget.kz
