يليا يلين: زىلتەمىر كوتەرۋ ءستيلىمدى تولىق وزگەرتتىم

تالدىقورعان. قازاقپارات - زىلتەمىرشىلەر يليا يلين مەن زۋلفيا چينشانلو ۇلكەن سپورتقا قايتا ورالدى. ولار تالدىقورعاندا جالاۋىن كوتەرگەن اۋىر اتلەتيكادان جەكە كوماندالار اراسىنداعى قازاقستان چەمپيوناتىندا باق سىنايدى، دەپ حابارلايدى قازاقپارات ءتىلشىسى.

دوپينگ داۋىنا ىلىگىپ، ارتىنشا حالىقارالىق اۋىر اتلەتيكا فەدەراتسياسىنىڭ شەشىمىمەن سپورتتان شەكتەتىلگەن اۋىر اتلەتتەر ءۇشىن بۇل وزدەرىن كورسەتۋدىڭ جاڭا ءبىر مۇمكىندىگى. سوندىقتان بۇل جارىسقا يليا يلين ەرەكشە دايىندىقپەن كەلىپ وتىر. سپورتشى 102 ك گ سالماقتا ونەر كورسەتپەك.

 «مەن ءوزىمنىڭ زىلتەمىر كوتەرۋ ءستيلىمدى تولىق وزگەرتتىم. ونى وزدەرىڭىز كورە جاتارسىزدار. ءدال قازىر جاڭا تەحنيكامدى مەڭگەرۋ ۇستىندەمىن. سوندىقتان ءبارىن ۋاقىت كورسەتەدى. مەن ءۇشىن ۋايىمداپ، ماعان قولداۋ كورسەتكەن بارلىق جانكۇيەرلەرىمە العىسىمدى بىلدىرەمىن. سىزدەر ماعان كۇش- قۋات بەرەسىزدەر» ، - دەدى يليا يلين.

سپورتشىنىڭ باستى ماقساتى بۇل دودادا جاقسى ونەر كورسەتىپ، الەم چەمپيوناتىنا جولداما الۋ.

ايتا كەتەيىك، تالدىقورعان قالاسىنداعى اۋىر اتلەتيكادان جەكە كوماندالار ارىسىنداعى ەل چەمپيوناتىنا 140 تان استام زىلتەمىرشى قاتىسۋدا. جارىس 2- قىركۇيەككە دەيىن جالعاسادى.