17:03, 28 - تامىز 2018 | GMT +5
قازاقستان قاجىلارىنىڭ العاشقى لەگى ەلگە ورالدى
استانا. قازاقپارات - قازاقستان قاجىلارىنىڭ العاشقى توبى الماتى حالىقارالىق اۋەجايىنا كەلدى. مادينا- الماتى باعىتى بويىنشا ۇشقان 437 قاجى ءدىن- امان ەلگە جەتتى، دەپ حابارلايدى قازاقپارات ءتىلشىسى.
«قازاقستان مۇسىلماندارى ءدىني باسقارماسى قاجىلىق ءبولىمىنىڭ مەڭگەرۋشىسى ايدار سالقىنبايەۆتىڭ ايتۋىنشا، جەرلەستەرىمىز كوپ بوگەلمەستەن كەدەندىك باقىلاۋدان وتكەن. ۇشۋ رەيستەرى كەستەگە ساي جۇزەگە اسۋدا. بۇگىندە وتانداستارىمىز مادينا قالاسىندا قۇلشىلىق جاساپ، تاريحي ورىنداردى زيارات ەتۋدە. ولارعا جولباسشى ماماندار مەن يمامدار ءتيىستى نۇسقاۋلىقتار بەرۋدە. قاجىلار ورنالاسقان قوناقۇيلەردە ءمۇفتيات بەكىتكەن تاقىرىپتار نەگىزىندە ۋاعىز- ناسيحات جۇمىستارى جۇرگىزىلۋدە» ، - دەپ جازدى قازاقستان مۇسىلماندارى ءدىني باسقارماسىنىڭ باسپا ءسوز حاتشىسى اعابەك قونارباي ۇلى فەيسبۋكتەگى پاراقشاسىندا.
ايتا كەتەيىك، بيىل ەلىمىزدىڭ 3000 ازاماتى قاجىلىق پارىزىن وتەدى.
اۆتور: مارلان جيەمباي
