ارىستانبەك مۇحامەدي ۇلى «ەتنواۋىلداعى» كۇيى كەتكەن تازىلاردى باقىلاۋىنا الدى
ايتا كەتسەك، بۇدان بۇرىن الەۋمەتتىك جەلىنى قولدانۋشىلاردىڭ ءبىرى جورا موروزوۆ ءوز پاراقشاسىندا كۇيى كەتكەن يتتەردىڭ ۆيدەوسىن سالعان بولاتىن. قولدانۋشىنىڭ ايتۋىنشا، ول ۆيدەونى «قازانات» اتشابارى جاقتا تۇسىرگەن.
ارىستانبەك مۇحامەدي ۇلى اتالعان «ەتنواۋىل» ۇلتتىق- مادەني ورتالىعى اۋماعىندا («قازانات» يپپودرومى) ەكى تازىنىڭ جاعدايى تۋرالى بۇگىن تۇندە كورگەنىن ايتادى.
«تاڭنان باستاپ جاعدايدى انىقتاۋعا كىرىستىم. مەكەمە بالانسىندا بىردە- ءبىر يت جوق. يتتەر تۇرعان قاماۋلار «ەتنواۋىل» ايماعىنداعى شارالارعا قاتىساتىن سىرتتان اكەلەتىن جانۋارلارعا ارنالعان. ەكى ءيتتىڭ دە يەسى - بەكبولات ەسىمدى جەكە تۇلعا، ولاردى پاۆلوداردان اكەلىپتى. ونىڭ ايتۋىنشا، ءبىراز ۋاقىت بۇرىن ەكى يت قورشاۋدان جوعالىپ كەتىپ، 10 كۇن ىزدەستىرۋدەن كەيىن وتە ناشار جاعدايدا قايتارىلىپتى. يتتەر جوعالعانى تۋرالى پوليتسياعا بەرگەن ارىزى بار»، - دەپ جازادى مينيستر.
ارىستانبەك مۇحامەدي ۇلىنىڭ نۇسقاۋىمەن ەكى ءيت تە استانانىڭ ۆەتەرينارلىق كلينيكاسىندا تولىق مەديتسينالىق زەرتتەۋدەن ءوتىپ، قاجەتتى ەم قابىلدايتىن بولادى.
«ۆەتەرينارلاردىڭ قورىتىندىسى بويىنشا، جانۋارلاردىڭ جاعدايى قاناعاتتانارلىق: تازى ستاندارتقا سايكەس ارىق بولۋى كەرەك. ءبىز يتتەردى ءىستىڭ ءمان- جايىن انىقتاعانشا سول جەردە قالدىرۋ قاجەت دەپ شەشتىك. ىشكى قىزمەتتىك تەكسەرۋ باستالدى. كىنالىلەر مىندەتتى تۇردە جازالاناتىن بولادى. يتتەردىڭ قوجايىنىمەن كەلىسىمشارتتى بۇزۋ تۋرالى جانە جورا موروزوۆتىڭ وپەراتسياعا جۇمسالعان قارجىسىن ۇستاپ قالۋ تۋرالى شەشىم قابىلداندى»، - دەيدى ارىستانبەك مۇحامەدي ۇلى.
مينيستر تازىلار تۋرالى جازبا اۆتورىنا جانۋارعا دەگەن مەيىرىمى مەن ادامگەرشىلىگى ءۇشىن العىس ءبىلدىردى.
«جانۋارلارعا مۇنداي قارىم- قاتىناسقا جول بەرمەۋىمىز كەرەك. ءبىراق يتتەردىڭ يەسى بار ەكەنىن ەسكەرىپ، ونىڭ جەكەمەنشىگىن تارتىپ الا المايمىز. قاجەت بولسا، قۇقىق قورعاۋ ۇيىمدارىنا جۇگىنەمىز. ەگەر قوجايىنىنان يتتەردى الاتىن بولسا، «ەتنواۋىل» ولاردى ءوز ساپىنا قابىلداپ، ءقاۋىپسىز جانە جايلى ءومىر سۇرۋلەرىنە جاعداي جاساۋعا دايىن»، - دەيدى مينيستر.
اۆتور: ايان بەكەن ۇلى
