مىنەزىڭىز كىممەن ۇيلەسپەيدى؟

 استانا. قازاقپارات - ادام سان ءتۇرلى مىنەزگە يە. ەكى اتتاس زاريادتاردىڭ تارتىلىپ، ءبىر اتتاس زاريادتاردىڭ تەبىسەتىنى سەكىلدى ادامدار دا كەيدە ءبىر- ءبىرىنىڭ مىنەزدەرىمەن ۇيلەسپەي جاتادى.

«ەكەۋمىزدىڭ مىنەزىمىز بىردەي بولعان سوڭ با، ءبىز ۇرسىسىپ قالا بەرەمىز» دەپ جاتامىز. ول راس. قانداي جاندار ءبىر- بىرىمەن ۇيلەسپەيدى؟ ءبىر مىنەزدى ادامداردىڭ وتباسى قانداي بولادى؟ «ءوزىمدى- ءوزىم تاربيەلەيمىن» ساباعىنىڭ دا كەلەسى تاقىرىبى - وسى...

ەكى شاتاق مىنەز بىرىكسە، پىشكەن توندارى كەلتە بولىپ شىعادى. ويتكەنى ءبىرىنىڭ ايتقانىن ءبىرى تىڭداعىسى كەلمەيدى. بىرىنە ءبىرى تاعى باعىنعىسى كەلمەيدى. اركىم ءوز ايتقانىن جاساعىسى كەلەدى. ولاردىڭ بىلاي تارتىپ اربانى سىندىرىپ، بىلاي تارتىپ وگىزدى ءولتىرىپ الاتىنى دا سوندىقتان. سول سەكىلدى قىرسىق مىنەزدىلەر، تەز اشۋعا بەرىلگىشتەردى دە وسى قاتارعا جاتقىزۋعا ابدەن بولادى.

ەكى مومىن بىرىگىپ تە ءىس العا باسپاس. باسقالار ءجونسىز باسىنىپ الادى دەپ قاۋىپتەنەمىز. مۇنداي جۇپتارعا ايداعانعا ءجۇرىپ، ايتقانعا كونۋگە تۋرا كەلەدى. مومىن جاندار تەك ىشتەن تىنادى. ولار ارام ويعا ەرىك بەرمەيدى. «وندا تۇرعان نە بار ەكەن؟»، «ءبىر ءمانىسى بولار»، «امالىن تابارمىز» دەپ ءالىپتىڭ ارتىن باعىپ جۇرەدى دە قويادى. ولار بىرەۋدى رەنجىتىپ الامىز با دەپ ارتىق سوزگە بارمايدى. الدەبىرەۋدىڭ كوڭىلىنە قاياۋ سالامىز- اۋ دەپ كوپ جەردە ءتىلىن تىيادى. كەيدە وسى ەكى مومىن قوسىلىپ كۇن كەشۋ مىنا زاماننىڭ تالابى ەمەس سەكىلدى بولىپ كورىنەدى.

ال ەكى سابىرلى جان بىرىكسە، ول باسقا اڭگىمە. سابىرلى مىنەز ادامدى اداستىرمايدى.

ەكى ۇنەمشىل قوسىلسا، شالقىعان بايلىققا كەنەلەدى. ءبىراق ولار ۇنەمى «جوق، جوقتان» وزگەنى اۋىزعا المايدى.

ەكى سايقىمازاق قوسىلسا، وتباسى سىرتتاي تاماشا كورىنگەنمەن، ءىشى لاس بولادى. ولار جۇرگەن جەرلەرىندە ەلدى قىران- توپان كۇلدىرىپ جۇرەدى. ءبىراق ولار ىشتەي ويسىراپ جۇرەدى. وزدەرىن كۇلكىمەن ەمدەيدى.

ەكى قوشقاردىڭ باسى ءبىر قازانعا سىيماعانداي، ەكى باستىقتىڭ دا باسى بىرىكپەيدى. ءارقايسىسى وزىنشە باسقارعىسى كەلەدى. اركىم ءوز ءامىرىن جۇرگىزگىسى كەلەدى. ءبىر- ءبىرىنىڭ اراسىندا باقتالاستىق تۋىپ، سوڭى جاقسىلىققا اپارمايدى.

ەكى ءتۇرلى مىنەزدى ادامدار كەيدە ءوزارا جاراسىپ جاتادى. ءبىرىنىڭ ءتىلىن ءبىرى تاۋىپ شۇيىركەلەسىپ كەتەدى. ويتكەنى ولار ءبىرى كوتەرىلگەندە ءبىرى باسىلا قالادى. ونداي جاندار كەشىرىم سۇراۋعا كەلگەندە دە قىڭىرلىق تانىتپايدى.

مىنەز - ادامنىڭ ماڭىزدى قاسيەتتەرىنىڭ ءبىرى. ادام مىنەزىمەن كوركەم. قىڭىر مىنەزدىڭ قىرىن تۇزەيتىن دە، اساۋ مىنەزگە تۇساۋ سالاتىن دا ءوزىڭىز!

 

 دەرەككوزى: «پ ت» توپتاماسىنان