قازاقستان نەمىس تۋريستەرىن قايران قالدىردى
شارتاراپتى شارلاپ جۇرگەن راينحارد پەن ينگريد كيزەلدەر استاناعا دا ات باسىن تىرەدى. 100 كۇندە مىڭداعان شاقىرىمدى ەڭسەرگەن ساياحاتشىلار 9 -مامىردا گامبۋرگتەن شىعىپ، وسى كۇنگە دەيىن ماسكەۋ، قازان، ءنوۆوسىبىر، ۆلاديۆوستوك، ۇلانباتىر سەكىلدى قالالاردا بولعان.
«ءبىز 2014 -جىلى زەينەتكە شىقتىق. سودان بەرى جاھان كەزىپ ءجۇرمىز. ءار حالىقتىڭ مادەنيەتىمەن ءھام تۇرمىس-تىرشىلىگىمەن تانىسقىمىز كەلەدى. بۇگىنگى ەرمەگىمىز وسى»، - دەيدى راينحارد كيزەل.
وتباسىلىق جۇپ وسى كۇنگە دەيىن 20-دان استام مەملەكەتتە بولعان. شاعىن اۆتوبۋسپەن سولتۇستىك جانە وڭتۇستىك امەريكانى دا ارالاپ شىعىپتى.
«ءبىز استانادا «بايتەرەك»، تاۋەلسىزدىك سارايى، ۇكىمەت ءۇيى مەن ەكسپونى كوردىك. مۇنداعى عيماراتتاردىڭ كوركى كوز تارتادى. اقيقاتىن ايتۋ كەرەك، اسىرەسە مەنى جەرگىلىكتى تۇرعىندار تاڭعالدىردى. قازاقستاندىقتار - وتە قوناقجاي حالىق. جول بويى بىزگە كومەك قولىن سوزىپ، اركەز قولداۋ كورسەتۋگە تىرىستى»، - دەيدى گەرمانيالىق ساياحاتشى.
ەۋرازياعا ساياحاتتى نەمىس وتباسى گەرمانيا مەن بارلىق مەملەكەتتەر اراسىنداعى دوستىعىنا ارنادى. جاھانكەزدەردىڭ بۇل تۋرنەسى قازان ايىندا اياقتالادى.
