بىشكەكتە التاي وركەنيەتىنە قاتىستى كونفەرەنتسيا ءوتىپ جاتىر
الەمنىڭ تۇكپىر- تۇكپىرىنەن زەرتتەۋشىلەردى جيناعان حالىقارالىق الاڭ وسىدان 60 جىل بۇرىن 1957 -جىلى ميۋنحەندەگى حالىقارالىق 24- شىعىستانۋشىلار كونگرەسىندە قۇرىلعان ەدى. التايستەر كونفەرەنتسياسى ءداستۇرلى تۇردە جىل سايىن وتكىزىلىپ كەلەدى.
«مۇنداي ءداستۇر زەرتتەۋشىلەر مەن عالىمداردىڭ التاي مۇراسىنىڭ مادەنيەتى مەن تاريحىن زەرتتەۋگە دەگەن زور قىزىعۋشىلىعىن كورسەتەدى» ، - دەدى قىرعىزستاننىڭ پرەزيدەنتى سوورونباي جەەنبەكوۆ.
«جىل سايىنعى حالىقارالىق كونفەرەنتسيا التايست- عالىمدار ءۇشىن التاي وركەنيەتىنىڭ تىلدەرى مەن مادەنيەتىن، مۇراسىن زەرتتەۋ بارىسىنداعى سوڭعى عىلىمي جاڭالىقتاردى تالقىلاۋعا جانە باسقا دا زەرتتەۋشىلەرمەن كەڭىنەن پىكىر الماسۋعا مۇمكىندىك بەرەدى» ، - دەدى قىرعىزستاننىڭ ەل باسقارۋشىسى.
ەل پرەزيدەنتى التاي وركەنيەتىنە قاتىستى پامير- التاي، تيان شان تاۋلارىنان سايان التاي مەن ەنيسەيگە دەيىنگى اۋماقتىڭ تابيعاتى، تاۋلارى مەن ورماندارى، دالاسى مەن وزەندەرى ءبىر ەكەنىن ايتتى. عالىمدار ءۇشىن ماڭگىلىك كوشپەندى وركەنيەتتى زەرتتەۋ - تاڭعالارلىق ەرەكشە تاقىرىپ بولىپ قالا بەرەدى. تاريح عىلىمىندا «حالىقتاردىڭ ۇلى كوشى» اتاۋىمەن تانىمال پروتسەستىڭ التاي وركەنيەتىمەن بايلانىسى بار ەكەنى بەلگىلى. بۇل مادەنيەتارالىق الماسۋدى كۇشەيتىپ، ءتىل، انتروپولوگيالىق جانە ناسىلدىك وزگەرىستەرگە الىپ كەلدى. سونداي- اق، عۇن، تۇرىك، قىرعىز، موڭعول، ماملۇك، تيمۋريد، وسمان، اۋسترو- ماجار سىندى جاڭا يمپەريالار پايدا بولدى.
كونفەرەنتسيا 30 - تامىزعا دەيىن جالعاسادى. جيىننىڭ قورىتىندىسىنا سايكەس، التاي وركەنيەتىنىڭ بەيمالىم تۇستارى تۋرالى ارنايى جيناق شىعارۋ جوسپارلانعان.
