قىزىلوردا وبلىسىنىڭ ەكس- اكىمى قايتىس بولدى
اتپال ازامات سانالى عۇمىرىن ەلىنىڭ دامۋىنا جۇمساعان بولاتىن. ول سىر ەلىن تاۋەلسىزدىكتىڭ العاشقى جىلدارىندا باسقاردى. ەڭ قيىن كەزەڭدە بيلىكتى تىزگىندەگەن باسشى بىلىكتىلىگىنىڭ ارقاسىندا تۇيىتكىلدى ماسەلەلەردى شەشە ءبىلدى. جۇمىسسىزدىقپەن كۇرەسۋدى قولعا الىپ، اۋىل شارۋاشىلىعى سالاسىن دامىتۋعا سۇبەلى ۇلەسىن قوستى.
سەيىلبەك شاۋحامانوۆ - 1939- جىلى قىزىلوردا وبلىسى جاڭاقورعان اۋدانىنا قاراستى وزگەنت اۋىلىندا دۇنيەگە كەلدى. 1962 -جىلى قازاق مەملەكەتتىك اۋىل شارۋاشىلىعى ينستيتۋتىن ءبىتىردى. مۇنان سوڭ الماتى جوعارى پارتيا مەكتەبىندە ءبىلىمىن جەتىلدىردى. ەڭبەك جولىن «قاز اۋىل شارۋاشىلىق تەحنيكاسى» بىرلەستىگىندە قاراپايىم مەحانيك بولۋدان باستادى. تىنىمسىز ەڭبەكتىڭ ناتيجەسىندە اتالمىش مەكەمەنىڭ ينجەنەرى بولىپ ەڭبەك ەتتى. 1965-1991 -جىلدارى كەڭەس وداعى كوممۋنيستىك پارتياسىنىڭ مۇشەسى بولدى.
1975-1980 -جىلدارى جالاعاش اۋدانىنىڭ ەكىنشى سەكرەتارى قىزمەتىن ابىرويمەن اتقاردى. كەيىن ول قىزىلوردا وبلىسى اكىمشىلىگىنىڭ ءبىرىنشى باسشىسى بولدى. ال 1992 -جىلى ق ر پرەزيدەنتى نۇرسۇلتان نازاربايەۆتىڭ بۇيرىعىمەن قىزىلوردا وبلىسىنىڭ اكىمى بولىپ تاعايىندالدى. سونداي- اق، سەيىلبەك شاۋحامانوۆ ق ر پارلامەنتى سەناتىنا سايلانعان تۇڭعىش دەپۋتات بولاتىن. ءومىرىنىڭ سوڭىنا دەيىن قوعامدىق ومىرگە بەلسەنە ارالاسىپ، وبلىستىق ارداگەرلەر كەڭەسىنىڭ ءتوراعاسى قىزمەتىن اتقاردى.
سەيىلبەك شاۋحامانوۆ - تاريحي تۇلعا. ول اۋىلدى گۇلدەندىرۋگە كوپ كوڭىل بولدى. الا جازداي ەگىن باسىندا تەر توگەتىن شارۋالارعا ۇلكەن قولداۋ كورسەتتى. تاۋەلسىزدىك العان جىلدارى ەسەڭگىرەپ قالعان حالىقتى ءبىر باعىتتا جۇمىلدىرا ءبىلدى. ەسەلى ەڭبەكتىڭ ارقاسىندا حالىقتىڭ قۇرمەت - قوشەمەتىنە بولەندى. قاشاندا تاجىريبەسىمەن بولىسۋگە اسىعاتىن. وبلىستىڭ ەكس- اكىمى زەينەتكە شىققاننان كەيىن دە قوعامدىق ومىرگە بەلسەنە ارالاساتىن. وتكىر ماسەلەلەر تۋراسىندا باتىل پىكىرلەر ايتىپ، ايماق دامۋىنا بەي- جاي قاراعان جوق.
بۇگىن نارتاي بەكەجانوۆ اتىنداعى وبلىستىق دراما تەاترىندا سەيىلبەك شاۋحامانوۆپەن قوشتاسۋ ءراسىمى مەن قارالى ميتينگ ۇيىمداستىرىلدى. جاناشىر ازاماتتى اقتىق ساپارعا شىعارىپ سالۋعا حالىق كوپتەپ جينالدى. قايعىدان قان جۇتقان مارقۇمنىڭ جاقىندارىنا كوڭىل ايتىپ، ەل اعاسىنىڭ جارقىن بەينەسى ماڭگى ەل جادىندا قالاتىنىنا سەندىردى.
فوتو: strategy2050.kz
اۆتور: اينۇر تولەشوۆا
