14:57, 27 - تامىز 2018 | GMT +5
الماتى اۋەجايىندا تۋىنداعان قاربالاستىڭ ءمان-جايى بەلگىلى بولدى
الماتى. قازاقپارات - حالىقارالىق الماتى اۋەجايىنىڭ پرەزيدەنتى ءتولقۇجات تەكسەرۋ ايماعىندا قاربالاس نەلىكتەن تۋىنداعاندىعىن ءتۇسىندىردى، دەپ حابارلايدى قازاقپارات ءتىلشىسى.
«تاڭەرتەڭ حالىقارالىق ۇشۋ زالىندا قاربالاس بولدى. FlyDubai اۋە كومپانياسىنىڭ رەيسى كەشىگىپ قوندى. ادامدار ساعات 3 تە ۇشۋدىڭ ورنىنا، 6 دا ءبىراق ۇشتى. بۇل قالىڭ كوپشىلىكتى دۇرلىكتىرگەنى راس. ويتكەنى تىركەۋ مەن قۇجات تەكسەرۋ كەزىندە ادامدار ۇزىن-سونار كەزەككە تۇردى»، - دەدى اۋەجاي پرەزيدەنتى بولات ەرجانوۆ.
ونىڭ ايتۋىنشا، تەك FlyDubai كەستەدەن تىس، قالعان رەيستەر ءوز ۋاقىتىندا ۇشىپ كەتكەن.
«قۇجات تەكسەرۋ كەزىندە ىعى-جىعى جۇرت ۇشۋ زالىنا سيماي كەتتى. كەزەكتى دەر كەزىندە رەتتەدىك. جولاۋشىلار ءتولقۇجات تەكسەرىسىنەن كەيىن رەيس كەستەسىمەن شىعارىلدى. ناقتى سانىن ايتا المايمىن، جوبامەن 150 ادامدى شىعارىپ سالدىق»، - دەدى ول.
