قازاق كۇرەسىنەن ازيا چەمپيوناتىندا ەڭ تومەنگى سالماقتا قازاق بالۋانى چەمپيون اتاندى

استانا. قازاقپارات - قازاق كۇرەسىنەن ءوتىپ جاتقان ازيا چەمپيوناتىنىڭ ەڭ تومەنگى سالماق دارەجەسىندە قازاق بالۋانى ەربول الدۋحان قارسىلاس شاق كەلتىرمەدى، دەپ حابارلايدى قازاقپارات ءتىلشىسى.

قازاقستان بالۋانى اقتىق سايىستا موڭعوليادان كەلگەن بۋحچۋيۋن داۆاانايامدى تىزە بۇكتىردى. ەڭ تومەنگى سالماقتا قولا مەدالدى تاجىكستاندىق وياتوللا قوجايەۆ يەلەندى.

ايتا كەتسەك، وسىعان دەيىن ازيا چەمپيوناتىندا 7 سالماق بويىنشا ءبىرىنشى ورىندار 3 قازاق جانە 3 موڭعول، 1 تۇرىكمەنستاندىق بالۋاندارىنىڭ ەنشىسىندە كەتتى.

ەسكە سالا كەتسەك، ەلورداداعى «داۋلەت» سپورت كەشەنىندە قازاق كۇرەسىنەن ازيا چەمپيوناتى ءوتىپ جاتىر. ازيا چەمپيوناتىندا 11 ەلدەن 77 بالۋان 8 سالماق دارەجەسى بويىنشا سىنعا تۇسۋدە. چەمپيوناتتا قازاقستان سورتشىلارىمەن بىرگە موڭعوليا، تاجىكستان، تۇرىكمەنستان، پاكىستان، وزبەكستان، شري-لانكا، جاپونيا، يران، قىرعىزستان، ءۇندىستاننان كەلگەن سپورتشىلار ءوزارا باق سىناستى. جالپى چەمپيوناتتىڭ جۇلدە قورى 20 مىڭ ا ق ش دوللارىنا باعالانۋدا.