ەركەبۇلان ەلگە ورالا ما؟
ۋفاداعى «نەفتيانيك» ستاديونىندا «ۋفانىڭ» جاستار قۇراماسى سانكت- پەتەربۋرگتىڭ «زەنيت» كلۋبىنداعى قۇرداستارىمەن كەزدەستى. بۇل ويىندا قوناقتار 5:0 ەسەبىمەن جەڭىسكە جەتتى. ەركەبۇلان الاڭدا سيمۋلياتسيا جاساپ، سارى قاعاز الدى. ءبىر رەت تەپكەن دوبى قاقپانىڭ جاقتاۋىنان قايتتى. ءبىر- ەكى ايىپ دوبىن ورىندادى. سەيداحمەتتىڭ 90 مينۋتتا كورسەتكەن ونەرىنەن بايقاعانىمىز وسى. فۋتبولشىنىڭ بۇل جاراقاتتان كەيىنگى الاڭعا العاش شىعۋىن ەسكە سالا كەتەيىك.
سەيداحمەت «ۋفاعا» نە ءۇشىن قاجەت؟
«ۋفا» وسىعان دەيىن ۋكراينالىق جاس تالانت الەكساندر زينچەنكونى «مانچەستەر سيتيگە» ساتقان بولاتىن. سوندىقتان باشقۇرستاننىڭ بۇل كومانداسى كوپتەگەن جاس تالانتتار ءۇشىن ەۋروپاعا باستايتىن باسپالداق سەكىلدى كورىنەدى. ەركەبۇلان وسى كلۋبقا اۋىسقاندا، وتاندىق جانكۇيەرلەردىڭ كوبىسى جاس بالانىڭ بۇل قادامىن قۇپتاعانداي بولدى. فۋتبولشىنىڭ ءوزى دە بولاشاقتا انگليا، يسپانيا چەمپيوناتتارىنىڭ بىرىندە ويناعىسى كەلەتىنىن ايتقان ەدى. ءتىپتى، ەۋروپادا دوپ تەپكەن العاشقى قازاق فۋتبولشىسى بولعىسى كەلەتىنىن جاسىرماعان.
جالپى، ءبىزدىڭ ەلدىڭ فۋتبولشىلارى الىس شەتەلگە كوپ شىعا قويمايدى. ويتكەنى، ەۋروپا تۇرماق رەسەيدىڭ وزىندە ولاردىڭ ويناپ كەتۋىنە ەشقانداي كەپىلدىك جوق. ونىڭ ۇستىنە بىزدەگىدەي ولارعا ءدال قازىر ەشكىم اقشا تولەمەيتىنى تاعى انىق. ءبىر كەزدەرى باۋىرجان يسلامحاننىڭ دا قادامى ءساتسىز اياقتالعان. ال جانكۇيەرلەر كارى قۇرلىقتا قاراگوزدەرىمىز ويناسا دەپ ارماندايدى. سول ويىمىزدى وسى ەركەبۇلان سەيداحمەت جۇزەگە اسىراتىنداي كورىنىپ تۇراتىن.
- رەسەي پرەمەر- ليگاسى - دەڭگەيى وتە جوعارى چەمپيونات. مەن يسپانيا مەن انگلياعا اۋىسۋ ءۇشىن شۇمەكتەپ كوپ تەر توگىپ جانە جاتتىعىپ، شەبەرلىگىمدى شىڭداي تۇسكىم كەلەدى. قازاقستان جانكۇيەرلەرى ماعان ىلعي جازىپ، قولداۋ ءبىلدىرىپ وتىرادى. بىلەمىن، مەن - قازاقستاننىڭ ءۇمىتىمىن. وكىنىشكە قاراي، بىزدە ازىرشە شەت ەلدە وينايتىن بىردە- ءبىر جوعارى دەڭگەيلى فۋتبولشى جوق. ال مەنىڭ اپل مەن يسپانيا پريمەراسىندا ويناعان ەڭ ءبىرىنشى قازاق بولعىم كەلەدى، - دەگەن ەركۇبۇلان «Vesti.kz» سايتىنا بەرگەن سۇحباتىندا سۇحباتىندا.
ەندى، «ۋفاعا» قازاق فۋتبولشىسى نە ءۇشىن كەرەك بولدى دەگەن سۇراققا توقتالىپ كورسەك. ەۋروپادا جارناما ءۇشىن ءوز ايماعىندا اتى شىعا باستاعان فۋتبولشىلاردى وزدەرىنە شاقىرىپ الاتىن ءادىس بار.
مىسالى، «مانچەستەر يۋنايتەد» ساپىندا قىتايلىق دۋن فانچجو دەگەن ويىنشى بولدى. ول كەزىندە «قىزىل سويقاندار» ساپىنا اۋىسقان العاشقى قىتاي ويىنشىسى اتاندى. ءبىراق الەكس فەرگيۋسون دۋندى الاڭعا سيرەك شىعاراتىن.
بۇل جەردەگى «مانچەستەر يۋنايتەدتىڭ» ماقساتى - دۋن ارقىلى كلۋبتىڭ قىتايداعى جانكۇيەرلەرىن سانىن كوبەيتۋ بولدى. ويتكەنى الەمدەگى حالىقتىڭ 25 پايىزى وسى ەلدە تۇرادى. سونداي- اق جىل سايىن ميۋ قىتايعا بارىپ، كوممەرتسيالىق تۋرنيرلەرگە قاتىسادى، كوپ اقشا تابادى. دۋندى سونداي ويىنداردا الاڭعا شىعارىپ قوياتىن. ونىڭ گول سوعۋى ءۇشىن ارىپتەستەرى دە ايانىپ قالمايتىن.
ءبىزدىڭ ەركوش تا «ۋفاعا» جانكۇيەر تارتۋ ءۇشىن قاجەت سەكىلدى كورىنەدى. ويتكەنى، سەيداحمەت الاڭعا شىعىپ قالا ما دەپ، كلۋبتىڭ رەسمي سايتىن، الەۋمەتتىك جەلىدەگى پاراقشالارىن اڭدىپ وتىراتىن قازاق جانكۇيەرلەرى كوپ. كوكتەمدە ول الاڭعا شىققاندا باشقۇرتستانعا ارنايى بارعان وتانداستارىمىز دا بولعان. بۇل ەندى ءبىزدىڭ بولجام.
«ۋفا» ديرەكتورى سەيداحمەتكە سەنەدى
ەركبۇلان ءتىپتى ماتچ الدىنداعى حاتتاماعا ىلىنبەي قالىپ جۇرگەندە، ونى باسقا كومانداعا اۋىسۋى مۇمكىن دەگەن قاۋەسەتتەر كوپ تارادى. الماتىنىڭ «قايراتىنا» جالعا بەرىلۋى مۇمكىن ەكەنى دە ايتىلعان. الايدا، فۋتبولشىنىڭ ءوزى مۇنى جوققا شىعاردى.
ال كەيىننەن«ۋفا» كلۋبىنىڭ ديرەكتورى شاميل گازيزوۆ «Vesti.kz» سايتىنا بەرگەن سۇحباتىندا ەركەبۇلان سەيداحمەتكە سەنەتىنىن ايتقان.
- سەيداحمەت وتە تالانتتى ويىنشى. ونىڭ پوتەنتسيالى جوعارى. «ۋفا» بۇل فۋتبولشىعا سەنىم ارتادى. ەركەبۇلاندى باسقا كلۋبقا ساتادى ەكەن نەمەسە جالعاسا بەرەدى دەگەننىڭ ءبارى جاي عانا قاۋەسەت. فۋتبولشى جاراقاتىنان ەندى ايىعىپ كەلەدى. تولىق جازىلعان سوڭ، الاڭعا شىعادى. ءبىز اسىقپايمىز، ول قاتارعا جىلدام ارادا قوسىلادى دەپ سەنەمىز، - دەگەن شاميل گازيزوۆ.
ەركەبۇلانعا ويىن تاجىريبەسى كەرەك
وتانداسىمىزعا قازىرگى كەزدە ەڭ باستىسى الاڭدا كوپ شىعىپ، دوپ تەبۋ قاجەت. بىلايشا ايتقاندا، مۇنداي جاستا قوسالقى قۇرامدا وتىرىپ قالۋ ونىڭ بولاشاعىنا كەرى اسەرىن تيگىزەدى. سوندىقتان ونىڭ قازاقستاننىڭ ءبىر كلۋبىنا ورالعانى دۇرىس ءتارىزدى.
ەركەبۇلان «ۋفاعا» اۋىسپاس بۇرىن «تارازدىڭ» وزىندە نەگىزگى قۇرامدا ويناعان جوق. ال بىردەن رەسەي چەمپيوناتىندا ويناپ كەتۋ وعان قيىن سوعارى انىق ەدى. دەڭگەيى تومەن بولسا دا، قازاقستان چەمپيوناتىندا ويناپ تاجىريبە جيناي بەرگەنى پايدالى بولار ەدى دەپ ويلايمىز. ارينە، سوڭعى شەشىمدى قابىلدايتىن فۋتبولشىنىڭ ءوزى.
الدا ۇلتتار ليگاسىنىڭ ويىنى بار. قازاقستان قۇراماسىنا ەركەبۇلاننىڭ كومەگى كەرەك بولادى. باس باپكەر ستانيمير ستويلوۆتىڭ وعان سەنىم ارتاتىنىن كوكتەمدە بايقادىق. رۋمىنيامەن وتكەن جولداستىق كەزدەسۋدە 18 جاستاعى شابۋىلشى گول دا سوققان ەدى. سول سەبەپتى بىزگە ەركەبۇلاننىڭ اپتا دايىن ويىنعا شىعىپ تۇرعانى پايدالى. «ۋفادا» ازىرگە وعان مۇمكىندىك از سەكىلدى.
سەيداحمەتتى شاقىرعان سەماك كەتىپ قالعان
ەركەبۇلان سەيداحمەتتى «ۋفاعا» شاقىرعان كەزدە باس باپكەر سەرگەي سەماك بولاتىن. ءبىراق ماۋسىم اياقتالعان سوڭ، ول سانكت- پەتەربۋرگتىڭ «زەنيت» كلۋبىنا باس باپكەر بولىپ اۋىسىپ كەتتى. كوكتەمدە جەرلەسىمىزدىڭ ءبىر ماتچقا شىعۋىنا دا مۇمكىندىك بەرگەن وسى سەماك ەدى.
سول ويىننان كەيىن باسپا ءسوز ماجىلىسىندە سەماك جەرلەسىمىزدىڭ دەبيۋتى تۋرالى «ۋفا» كومانداسىنىڭ رەسمي سايتىن بەرگەن سۇحباتىندا بىلاي دەگەن:
- سەيداحمەتتىڭ دەبيۋتىنە كەلەتىن بولساق، وعان كەيبىر ساتتە اگرەسسيا جەتىسپەي جاتتى. اسىرەسە، قورعانىستا السىزدەۋ بولدى. ال شابۋىلدا ەكى گولدىڭ سوعىلۋىنا ات سالىستى. ول ءالى جاس سوندىقتان قاتەلىكتەرىنە تۇسىنىستىكپەن قارايمىز. ءبىز ونىڭ كۇشتى جانە ءالسىز تۇستارىن جاقسى بىلەمىز. ءبىرىنشى رەت الاڭعا شىعۋ ءاردايىم قيىن. دەگەنمەن ەركوش تاپسىرمانى ورىنداپ، كوماندانىڭ جەڭىسكە جەتۋىنە ءوز ۇلەسىن قوستى. ەندەشە، ەركەبۇلاندى قۇتتىقتاۋعا رۇقسات ەتىڭىزدەر» ، - دەپ ەدى سەرگەي سەماك.
قازىرگى كەزدە «ۋفانى» سەرگەي توماروۆ جاتتىقتىرادى. بۇرىننان وسى كلۋبتىڭ جۇيەسىندە جۇرگەن مامان. بۇعان دەيىن سەرگەي سەماكتىڭ كومەكشىسى بولعان. ول كەتكەن سوڭ، باس باپكەر بولىپ تاعايىندالدى. قازاقستان قۇراماسىنىڭ باس باپكەرى بولعان الەكساندر بوروديۋك «موسكوۆسكي كومسومولەتسكە» بەرگەن سۇحباتىندا توماروۆتى تاعايىنداۋ دۇرىس شەشىم بولعانىن ايتادى.
- مەنىڭشە، كلۋبتىڭ شەشىمى قۇپتارلىق. ويتكەنى، سەرگەي توماروۆ ۇزاق ۋاقىت وسى كلۋبتىڭ وتىمەن كىرىپ، كۇلىمەن شىعىپ ءجۇر. كولۆانوۆ، لوسيەۆ، گونچارەنكو، سەماكتىڭ كومەكشىسى بولىپ تاجىريبە جينادى. كلۋب باسشىلىعى ەندى وزىنە مۇمكىندىك بەرىپ وتىر. تاجىريبەسى جوق دەگەنگە كەلىسەمىن. ءبىراق ول ەگەر كوماندا جاقسى ويناپ جاتسا، ابىرويى ارتادى، تاجىريبە دە ۋاقىتىمەن جينالادى، - دەيدى ا. بوروديۋك.
سەماكقا قاراعاندا توماروۆ ەركەبۇلان سەيداحمەتكە اسا قاتتى سەنىم ارتپايتىن سياقتى كورىنەدى. فۋتبولشىنى دۋبلگە اۋىستىرۋى دا وسى ءسوزىمىزدى دالەلدەيدى تۇسەتىندەي.
Baq.kz
