ماسكەۋدەن سارايشىق قالاسى ەنگىزىلگەن «قۇپيا» كارتا تابىلدى

  استانا.  قازاقپارات - سارايشىق اۋىلىنداعى كونە قالانىڭ ورنىنان قاسىم حاننىڭ سارايى تابىلۋى ابدەن مۇمكىن. بۇل - وسى باعىتتا قازبا جۇمىستارىن باستاعان ارحەولوگ مامانداردىڭ پىكىرى. بۇل تۋرالى «اتىراۋ گازەتى» حابارلادى.

سولاردىڭ ءبىرى مارات قاسەنوۆ تاياۋدا ماسكەۋ قالاسىنان كونە شاھار ەنگىزىلگەن «قۇپيا» كارتا تابىلعانىن ايتادى. قۇندى جادىگەر 18 عاسىرعا تيەسىلى ەكەن.

- بۇل كارتا ارقىلى تىڭ مالىمەتتەر قولىمىزعا ءتيىپ وتىر. ءبىر كەزدەرى ۇلى جىبەك جولىنىڭ بويىنان ورىن تەپكەن تاريحي مەكەن اۋماعى ۋاقىت وتكەن سايىن كىشىرەيىپ كەلەدى. ونىڭ كوپ بولىگى سۋ استىندا قالىپ، تەك 20 پايىزى عانا ساقتالىپ وتىر. بۇعان ەسكى ۇيىندىلەردى لەزدە شايىپ اكەتەتىن ورال وزەنى سەپ بولۋدا. قايتا بيىل جاعاجايدى بەكىتۋ جۇمىسى قولعا الىندى، - دەيدى ول.

بۇدان بولەك، جىلىتۋعا ارنالعان پەش تە تابىلعان. سول سياقتى، ХVІІІ عاسىرداعى تيىندار جانە كۇمىس، بويتۇمار، سۇيەك پەن قىشتان جاسالعان بۇيىمدار بار. اتىراۋ تاريحي- ولكەتانۋ مۇراجايىنىڭ ديرەكتورى راشيدا حاريپوۆانىڭ ايتۋىنشا، سوڭعى رەت بۇل جەردە قازبا جۇمىستارى ون جىل بۇرىن جۇرگىزىلگەن. ول كەلەسى جىلى دا جالعاسىن تابادى.

قالاي دەسەك تە، تالاي سىردى ىشىنە بۇككەن سارايشىق بۇگىندە «قازاقستاننىڭ كيەلى جەرلەرىنىڭ گەوگرافياسىنا» ەنگىزىلىپ وتىر. بۇل - جەرگىلىكتى تۇرعىندار ءۇشىن ۇلكەن ماقتانىش.