قازاقستانداعى اقىلى جولداردا اۆتوماتتى تارازىلار ورناتىلدى
«اقىلى جول ءبىراز ۋاقىتتان بەرى استانا مەن بۋراباي ارالىعىندا ەنگىزىلدى. ەندى باسقا دا رەسپۋبليكالىق ماڭىزداعى جولداردا اقىلى جۇيەنى ەنگىزۋ جۇمىستارى جۇرگىزىلۋدە. قازىرگى ۋاقىتتا الماتى- قورعاس، استانا- تەمىرتاۋ جانە الماتى- قاپشاعاي اۆتوجولدارىنىڭ ۋچاسكەلەرىندە اقى تولەۋ جۇيەسىن ەنگىزۋ جۇمىستارى اتقارىلىپ جاتىر» ، - دەدى ق ر ي د م كولىك كوميتەتى ءتوراعاسىنىڭ ورىنباسارى داۋرەن ءسابيتوۆ.
بەلگىلى بولعانداي، وسى جۇيە قىركۇيەك ايىندا تەستىلىك رەجىمدە ىسكە قوسىلماق.
ءوز كەزەگىندە «قازاۆتوجول» ۇ ك» ا ق بيزنەستى دامىتۋ جونىندەگى باسقارۋشى ديرەكتورى رۋستام يسايەۆ بۇگىندە ەلىمىزدە اقىلى جۇيەنىڭ جۇمىسىن قامتاماسىز ەتەتىن ارنايى تۇعىرناما ازىرلەنگەنىن اتاپ ءوتتى. قازىرگى كەزدە وسى تۇعىرناما اياسىندا «استانا- بۋراباي» جولىنداعى جۇيە ءجۇمىس ىستەپ تۇر.
«بۇل باعدارلامالىق تۇرعىرناما «قازاۆتوجول» تاراپىنان جەكە دايارلاندى. الداعى ۋاقىتتا بۇل جۇيەنى وزگە دە اقىلى ۋچاسكەلەرگە ەنگىزبەكپىز» ، - دەدى يسايەۆ.
ونىڭ سوزىنە قاراعاندا، اتالعان جولداردا جول اقىسىن ەسەپتەيتىن بەكەتتەردە اۆتوماتتى تارازىلار ورناتىلعان.
«بۇل جابدىقتار قوزعالىستاعى كولىكتەردىڭ سالماعىن انىقتايدى. وسى ارقىلى جۇكتى شامادان تىس تيەگەن اۆتوكولىكتەردىڭ جولدىڭ قاباتىنا قانشالىقتى زالال كەلتىرگەنى بەلگىلى بولادى. بۇدان كەيىن بۇل اقپاراتتى «سيتۋاتسيالىق ورتالىقتارعا» باعىتتايمىز. سايكەسىنشە، كولىك كوميتەتى ءتيىستى جۇمىستاردى اتقارادى» ، - دەدى رۋستام يسايەۆ.
