لاستانعان اۋا ادام ءومىرىن نەشە جىلعا قىسقارتاتىنى انىقتالدى

 استانا. قازاقپارات -  عالىمدار الەمنىڭ ءتۇرلى بۇرىشىنداعى لاستانعان اۋا ادام ءومىرىن قانشا جىلعا قىسقارتاتىنىن ەسەپتەپ شىقتى.

زەرتتەۋلەرگە قاراعاندا، لاستانعان اۋا جەر شارىنداعى ادامدار جاسىن شامامەن 1 جىلعا، ازيا مەن افريكا مەملەكەتتەرى ازاماتتارىنىڭ ءومىر ءسۇرۋىن 1,5-2 -جىلعا دەيىن قىسقارتادى. عالامشارىمىزداعى اۋا قۇرامىندا زياندى ەلەمەنتتەر جىلدان جىلعا كوبەيىپ كەلە جاتىر. مۇنىڭ كەسىرىنەن ادامدار وكپە اۋرۋلارى، جۇرەك پەن قان- تامىر جۇيەسى اۋرالارىنان ەرتە قايتىس بولادى. ستاتيستيكاعا سۇيەنسەك، جەر شارىنداعى ادامداردىڭ 95 پايىزى زياندى اۋامەن دەم الادى. تەحاس ۋنيۆەرسيتەتى عالىمدارى 2016 -جىل 185 مەملەكەتكە قاتىستى زەرتتەۋىن جاريالادى.

 ساراپتاما ناتيجەسى بويىنشا، لاستانعان اۋا ادام ءومىرىن ورتاشا 1,03 جىلعا قىسقارتاتىنى انىقتالعان. ال تەمەكى شەگۋ 1,82 جىلعا، ساپاسىز ىشىمدىك سۋى 0,57 جىلعا، دۇرىس تاماقتانباۋ 2,67 جىلعا ءومىر ءسۇرۋ ۇزاقتىعىن شەگەرەدى. اۋاسى تازا مەملەكەتتەر تىزىمىنە ا ق ش، ەۋروپا، اۆستراليا ەلدەرى كىرگەن. نەگىزىنەن ازيا مەن افريكا اۋماعىنداعى 42 مەملەكەت اۋاسى وتە لاستانعان ەلدەر تىزىمىندە. زەرتتەۋ كەزىندە اۋاسى ەڭ لاس وڭتۇستىك ازيا ەكەنى انىقتالعان.

ايتا كەتەتىن جايت، بۇل ايماقتا لاستالعان اۋا قاتەرلى ىسىكتىڭ بارلىق تۇرىنەن دە ءقاۋىپتى. ەستەرىڭىزگە سالا كەتەيىك، پاريجدە 1 -جىل ءومىر ءسۇرۋ 182 تال تەمەكى شەككەنمەن بىردەي ەكەنىن جازعان ەدىك. "Le Parisien" گازەتىننىڭ مالىمەتىنە قاراعاندا، قالاداعى 1 تەكشە مەتر اۋا قۇرامىندا 22 ميكروگرامم ۋلى ەلەمەنتتەر بار. بۇل 2 تال تەمەكى شەگۋدىڭ زيانى پاريجدە 4 كۇن ءومىر سۇرگەنمەن بىردەي دەگەن ءسوز. پاريجدەگى اۋانىڭ لاستانعانى سونداي، ءتىپتى دەنە شىنىقتىرۋمەن اينالىسقاننىڭ ءوزى پايدا بەرمەيدى، كەرىسىنشە دەنساۋلىعىڭىزعا زيان. وتكەن جىلى پاريج مەتروسىنداعى اۋانىڭ لاستىعى سىرتقى اۋادان 10 ەسە كوپ ەكەنى انىقتالعان.

Massaget.kz