جامبىلدىق وقۋشىلار جەتى جىل بويى ەلىمىزدىڭ ءبىلىم سايىستارىندا كوش باستاپ كەلەدى

تاراز. قازاقپارات - تارازداعى «بالاساعۇن» ورتالىق كونسەرت زالىندا «ءتورتىنشى ونەركاسىپ رەۆوليۋتسياسى جاعدايىنداعى ادام كاپيتالى» تاقىرىبىندا پەداگوگتاردىڭ تامىز كەڭەسى ءوتتى، دەپ حابارلايدى قازاقپارات ءتىلشىسى.

شارادا جامبىل وبلىسىنىڭ اكىمى اسقار مىرزاحمەتوۆ وبلىس مەكتەپتەرى ءۇشىن وتكەن وقۋ جىلى ءساتتى بولعانىن ايتتى.

«وتكەن وقۋ جىلىندا جامبىلدىق وقۋشىلار رەسپۋبليكالىق، حالىقارالىق وليمپيادالار مەن عىلىمي سايىستاردا 143 مەدال جەڭىپ الدى. جالپى رەسپۋبليكالىق وليمپيادالاردىڭ قورىتىندىلارى بويىنشا، جامبىل وبلىسى كومانداسى جەتىنشى جىل قاتارىنان ءبىرىنشى ورىندى يەلەنىپ، «ۇزدىك وليمپيادا كومانداسى» اتانىپ كەلەدى.

دارىندى بالالارعا ارنالعان «ءبىلىم- يننوۆاتسيا» مەكتەپ- ينتەرناتى ونىنشى جىل قاتارىنان «ۇزدىك وليمپيادا مەكتەبى» اتانىپ وتىر. وليمپيادا جانە عىلىم سايىستارى جۇلدەگەرلەرىنىڭ 63 پايىزى مامانداندىرىلعان مەكتەپتەردىڭ وقۋشىلارى ەكەنىن ايتا كەتكەن ءجون. بۇل جەتىستىكتەرگە وقىتۋشىلاردىڭ ەرەن ەڭبەگى مەن اتا-انالاردىڭ قاداعالاۋى ارقىلى قول جەتتى. بيىل وبلىستاعى 508 پەداگوگ رەسپۋبليكالىق كونكۋرستاردىڭ جەڭىمپازى بولدى»، - دەدى ءوڭىر باسشىسى.

جامبىل وبلىسىنىڭ اكىمى «ءبىلىم- يننوۆاتسيا» مەكتەپ- ينتەرناتىنىڭ تاجىريبەسىن باسقا مەكتەپتەردە دە ەنگىزۋدى ۇسىندى.

وبلىستىق ءبىلىم باسقارماسىنىڭ مالىمەتتەرىنە قاراعاندا، جاڭا وقۋ جىلىندا ون اۋدان ورتالىعىنىڭ بارلىعىندا جانە تاراز قالاسىندا تابيعي- ماتەماتيكالىق پاندەردى تەرەڭدەتە وقىتاتىن 11 مەكتەپ- ليتسەي اشىلادى. بۇدان تىس، دارىندى بالالارعا ارنالعان مەكتەپتەردىڭ جەلىسى ۇلعايتىلادى.

جاڭا وقۋ جىلىندا وبلىس ورتالىعىندا اقپاراتتىق تەحنولوگيالار ليتسەي-ينتەرناتى اشىلادى. وندا بالالار ماتەماتيكا مەن فيزيكانى تەرەڭدەي وقيدى. جىل سوڭىنا دەيىن 12 ІТ- سىنىپ اشىلىپ، وقۋشىلارعا 3D- مودەلدەۋ، باعدارلامالاۋ، روبوت تەحنيكاسىنىڭ قىر-سىرى ۇيرەتىلەدى.