07:20, 25 - تامىز 2018 | GMT +5
اتاقتى ءانشىنى ولتىرگەن قىلمىسكەردىڭ بوستاندىققا شىعۋ تۋرالى ءوتىنىشى ونىنشى رەت قابىلدانبادى
استانا. قازاقپارات - نيۋ-يورك شتاتىنىڭ كوميسسياسى اتاقتى مۋزىكانت دجون لەننوندى ولتىرگەن مارك چەپمەننىڭ مەرزىمىنەن بۇرىن بوستاندىققا شىعۋ تۋرالى ءوتىنىشىن ونىنشى رەت قابىلداماي تاستادى، دەپ حابارلايدى قازاقپارات 24.kz سىلتەمە جاساپ.
كوميسسيا مۇشەلەرى ونى بوساتۋ قوعام قاۋىپسىزدىگىنە قايشى كەلەدى دەگەن ۇيعارىمعا كەلگەن. ۇكىمدە مارك چەپمەن بۇكىل الەمگە ايگىلى ادامدى ەشبىر نەگىزسىز، تەك ەلگە تانىلۋ ءۇشىن عانا ولتىرگەنى ايتىلعان. سونداي-اق ونى بوساتسا، چەپمەننىڭ وزىنە دە قاتەر ءتونۋى مۇمكىن. سەبەبى اتىن شىعارۋ ماقساتىندا ونى ولتىرۋگە دايىن ادامداردىڭ تابىلا قويۋى عاجاپ ەمەس. ەندى چەپمەن بوستاندىققا شىعۋ ءوتىنىشىن ەكى جىل وتكەننەن كەيىن عانا بەرە الادى.
ەسكە سالا كەتسەك، 1980 -جىلى ول دجون لەننوننان قولتاڭبا سۇراپ تۇرىپ، 5 رەت اتىپ ولتىرگەن. سوت بارىسىندا ول وسى قىلمىسقا قوعامنىڭ نازارىن وزىنە اۋدارۋ ءۇشىن بارعانىن ايتقان. 2000 -جىلدان بەرى چەپمەن ءار ەكى جىل سايىن ءوزىن بوساتۋدى ءوتىنىپ ءجۇر.
