قازاقستاندا جاڭا اۆتوكولىكتەر قىمباتتاۋى مۇمكىن
ا ق ش اقشاسى قىمباتتاعالى اۆتوسالونداردا باعا وزگەرگەن جوق. شەتەلدىك كولىكتەردىڭ قۇنى ازىرگە وسە قويماعان. ءبىراق سۋ جاڭا تەمىر تۇلپارلاردىڭ جاڭا پارتياسىنا جاڭا باعا قويىلۋى مۇمكىن.
«قازىر تۇرعان اۆتوكولىكتەرگە تاپسىرىستى ءبىز قاڭتار ايىندا بەرسەك، ول كەزدە دوللاردىڭ باعاسى 320 تەڭگە بولاتىن. قازىرگى ۋاقىتتا 360 تەڭگە. سوندىقتان كەلەسى جىلدىڭ باسىندا كەلەتىن اۆتوكولىكتەر قىمبات بولاتىن شىعار»، - دەيدى «MERCUR AUTO» كومپانياسى ساتۋ ءبولىمىنىڭ مەنەدجەرى نۇرجان ماعزۇموۆ.
اۆتوموبيل ساتۋشىلار كولىكتى دوللارمەن عانا ەمەس، رۋبلمەن دە ساتىپ الادى. رۋبلگە قاتىستى تەڭگە باعامى تۇراقتى. سوندىقتان رەسەيلىك كولىكتەر قۇنى ساقتالۋى ىقتيمال. ءبىراق باعام اۋىتقىعالى اۆتوسالونداردا ساتىپ الۋشىلار قاراسى كوبەيىپ، نە ازايماعان. ءبىراق ماماندار كولىكتى قازىر العان دۇرىس دەپ وتىر.
«شەتەلدەن كەلگەن كومپونەنتتەر بۇرىنعى باعامەن كىرگىزىلدى دە، كولىكتەر بۇرىنعى باعامەن ساتىلىپ وتىر. كەيىن دوللاردىڭ قىمباتتاۋىنا بايلانىستى كولىكتەر دە قىمباتتاۋى كەرەك. جارتى جىل ۋاقىت ارالىعىندا قىمباتتاۋى مۇمكىن. سوندىقتان جوسپارلاپ وتىرعان كولىك الاتىن ادامدار قازىر الىپ العانى ءجون دەپ ويلايمىن»، - دەيدى «قازاقستان اۆتوبيزنەس قاۋىمداستىعىنىڭ» تەحنيكالىق رەتتەۋ ديرەكتورى ەربول سەيپىلوۆ.
دەگەنمەن، ماماندار وتاندىق كولىكتەر باعاسى ساقتالادى دەپ وتىر. بيىل ءوندىرىس 86 پايىزعا ارتقان. بيىل 17 مىڭ جۇيرىك تۇلپار قۇراستىرىلعان. ولاردىڭ جالپى قۇنى شامامەن 104 ميلليارد تەڭگەنى قۇرايدى.
ال «قازاۆتوونەركاسىپ» ديرەكتورلار كەڭەسىنىڭ ءتوراعاسى ولەگ الفەروۆ: «ازىرگە ايتارلىقتاي الاڭداۋشىلىققا ەش نەگىز جوق جانە دابىل قاعۋ ەرتە. بۇگىنگى تاڭدا قازاقستاندىق نارىقتاعى قولجەتىمدى 10 كولىكتىڭ بەسەۋى وتاندىق بولىپ تابىلادى» دەگەن پىكىر بىلدىرگەن.
بۇل پىكىرگە قاراماستان اۆتوبلوگەر دياس ءۋاليحانوۆ باعا ءبىر ايدان سوڭ-اق قۇبىلادى دەپ بولجايدى. سوندىقتان كولىككە سۇرانىس تومەندەيتىنىنە سەنىمدى. «بارلىعى جاڭا باعاممەن ساتا باستايدى. سوندىقتان باعا كوتەرىلەدى. بۇل، مەنىڭشە، تۇراقتى بولىپ كەلگەن ساتىلىمعا اسەر ەتەدى. جىل باسىنان بەرى ساۋدا جاقسى بولدى، ءبىراق ەندى تومەندەيدى. از ساتىلا باستايدى»، - دەيدى ول.
