ەلىمىزگە قاتەرلى ىسىك دەرتىن باستاپقى كەزەڭدە انىقتايتىن اپپارات اكەلىندى

استانا. قازاقپارات - ەلىمىزدە ونكولوگيالىق اۋرۋلاردى اسقىندىرماي، دەرتتەن ارىلۋعا مۇمكىندىك ارتتى. سەبەبى رەسپۋبليكالىق دياگنوستيكالىق ورتالىققا قاتەرلى ىسىكتى ەرتە كەزەڭدە انىقتايتىن اپپارات اكەلىندى.

پوزيتروندى ەميسسيالىق توموگرافيا -  ادامدى يادرولىق مەديتسيناداعى جوعارعى تەحنولوگيالىق دياگنوستيكالاۋ ءادىسى ارقىلى تەكسەرەدى. وسى اپپارات كومەگىمەن قاتەرلى دەرتتى اسقىندىرماي، ەمدى ەرتە باستاۋعا بولادى.

ول اعزاداعى الماسۋ ۇردىسىندەگى اۋىتقۋشىلىقتاردى مولەكۋلا دەڭگەيىندە انىقتاپ، ىسىك وشاعىن بىلۋگە مول مۇمكىندىك بەرەدى. ال كارديولوگيا سالاسىندا ميوكاردتاعى زات الماسۋ اۋىتقۋشىلىعىن دياگنوستيكالاۋعا كومەكتەسەدى.

جاڭا تەحنولوگيانىڭ تاعى ءبىر ارتىقشىلىعى - جاسالعان ەمنىڭ قالاي اسەر ەتكەنى باقىلانادى. وعان قوسا ءبىر ۋاقىتتا كومپيۋتەرلىك توموگرافيا مەن پوزيتروندى ەميسسيالىق توموگرافيا جاسالادى. ايتا كەتۋ كەرەك، مۇنداي اپپارات ەلىمىزدە 2010 -جىلدان بەرى جۇمىس ىستەيدى. الايدا جالعىز بولعاندىقتان ناۋقاستار كەزەكتى كوپ كۇتكەن. ەندى ەكىنشىسىنىڭ اكەلىنۋى ۇدەرىستى جىلدامداتادى، - دەيدى ماماندار.

عاليا رىسقۇلوۆا، «ردو» ا ق راديويزوتوپتىق دياگنوستيكا ءبولىمىنىڭ مەڭگەرۋشىسى:

 - بۇرىن بىزدە ءبىر اپپاراتپەن جۇمىس ىستەپ جاتقان كەزدە ءبىر اي، ءبىر جارىم اي كەزەك كۇتەتىن. ەندى ەكىنشى اپپارات قويىلعاننان كەيىن ءبىر جۇما، ءبىر جارىم جۇما كەزەك بولادى دەپ ويلايمىن. جاڭا اپپاراتقا باسقا دارىگەرلەر كەرەك ەمەس. بىزدە التى دارىگەر بار. تاعى دا ەكى دارىگەردى دايىنداپ جاتىرمىز. كۆوتامەن كەلەدى بىزگە ەمگە، تاعى دا كۆوتادان باسقا اقى تولەپ وتۋگە بولادى. ونىڭ باعاسى 235 مىڭ 700 تەڭگە.

www.24.kz