ا ق ش پەن رەسەي بيلىگى وكىلدەرى جەنيەۆادا كەزدەستى

 استانا. قازاقپارات - ا ق ش پرەزيدەنتىنىڭ ۇلتتىق قاۋىپسىزدىك جونىندەگى كەڭەسشىسى دجون بولتون مەن رەسەي قاۋىپسىزدىك كەڭەسىنىڭ حاتشىسى نيكولاي پاترۋشيەۆ جەنيەۆادا كەزدەستى. كەزدەسۋ قورىتىندىسىندا بىرلەسكەن مالىمدەمە جاسالمادى.

بولتوننىڭ ايتۋىنشا، كەلىسسوزدە ول ا ق ش- تاعى پرەزيدەنت سايلاۋىنا رەسەيدىڭ كيلىگۋى ماسەلەسىن كوتەرگەن.

ا ق ش پرەزيدەنتىنىڭ كەڭەسشىسى ۆاشينگتون كەزەكتى سايلاۋ پروتسەسىنە باسقا ەلدىڭ ارالاسۋىنا ەندى جول بەرمەيتىنىن ايتتى. ونىڭ سوزىنشە، ا ق ش قاراشا ايىندا وتەتىن كونگرەسس سايلاۋىنا كەدەرگى جاسالۋىنا جول بەرمەيدى.

جابىق وتكەن ەكى تاراپتىڭ كەزدەسۋى بەس ساعاتقا سوزىلدى. كەزدەسۋ بارىسىندا سيرياداعى سوعىس، ۋكراينانىڭ شىعىسىنداعى قاقتىعىس جانە ەكىجاقتى قارىم-قاتىناس اياسىندا ا ق ش سانكتسياسىنىڭ كۇشەيۋى ماسەلەسى تالقىلاندى.

پاترۋشيەۆ كەلىسسوز اياقتالعاننان كەيىن، ا ق ش رەسمي وكىلدەرىن رەسەيگە شاقىردى. ءبىراق كەلەسى كەزدەسۋدى قاشان وتكىزۋ جونىندە كەلىسىم جاسالمادى.

«ازاتتىق»