استانادا مۇعالىمدەردىڭ جالاقىسىن قالاي كوتەرەدى

 استانا. قازاقپارات - استانا قالاسىنىڭ اكىمى اسەت يسەكەشيەۆ جاڭا تەحنولوگيالاردىڭ نەگىزىندە قانشا قارجىنىڭ ۇنەمدەلگەنىن جاريالادى، دەپ حابارلايدى قازاقپارات ءتىلشىسى.

اكىمنىڭ سوزىنە قاراعاندا، مەكتەپتەردە «بۇلتتى بۋحگالتەريا» اتتى جاڭا تەحنولوگيانى ەنگىزۋدىڭ ناتيجەسىندە ءبىر جىلدا 350 ميلليون تەڭگە ۇنەمدەلدى. وسى اقشانىڭ 80 پروتسەنتى مۇعالىمدەرگە سىياقى رەتىندە تاراتىلدى. الداعى ۋاقىتتا اتالعان جوباعا كوللەدجدەر مەن باسقا دا مەكەمەلەر قوسىلادى.

«ال جان باسىنا قاراي قارجىلاندىرۋ جۇيەسى ارقىلى مۇعالىمدەردىڭ لاۋازىمدىق جالاقىسىن كوتەرۋگە بولادى. استانادا ونداي جۇيەگە 8 مەكتەپ كوشىپ جاتىر. تالداۋعا سايكەس، قارجىنى ءتيىمدى تاراتۋدىڭ ناتيجەسىندە ءاربىر مەكتەپ بيۋدجەتتىڭ 20 پروتسەنتىن ۇنەمدەپ، سوعان مۇعالىمدەردىڭ جالاقىسىن كوتەرە الادى. مىسالى، بىلتىر مۇعالىمدەردىڭ ورتاشا جالاقىسى  000 100- 110000 تەڭگە بولسا، بيىل جاڭارتىلعان ءبىلىم مازمۇنى ءۇشىن بەرىلەتىن ۇستەماقى مەن جان باسىنا قاراي قارجىلاندىرۋ جۇيەسىمەن بىرگە ورتاشا جالاقى  150000 تەڭگەدەن اسۋى ابدەن مۇمكىن» ، - دەدى ءا. يسەكەشيەۆ ءبىلىم باسقارماسىنىڭ ۇيىمداستىرۋىمەن وتكەن تامىز كونفەرەنتسياسىندا.

ايتا كەتەيىك، بۇگىنگى جيىندا قالا اكىمى قاي مۇعالىمدەرگە پاتەر بەرەتىنىن ايتتى.

بۇگىندە رەسپۋبليكا بويىنشا ءبىر مەكتەپكە شامامەن 800-1500 وقۋشى كەلەدى. ال ەلوردادا اتالعان كورسەتكىش 1500 گە جەتىپ وتىر. الداعى بەس جىلدا استاناعا تاعى 120 مىڭنان استام وقۋشى كەلەدى دەگەن بولجام بار.

«2011 -جىلى ەلوردا مەكتەپتەرىندە 75 مىڭ وقۋشى وقىسا، بىلتىر اتالعان كورسەتكىش 140 مىڭعا جەتتى. بيىل 155 مىڭ وقۋشى بولادى دەپ وتىرمىز. وسىعان بايلانىستى الداعى بەس جىلدا مەملەكەتتىك بيۋدجەتتىڭ ەسەبىنەن 24 مەكتەپ سالىنادى» ، - دەيدى ءا. يسەكەشيەۆ.