كۇندەلىكتى قاجەتتى زاتتاردى الماي-اق ساياحاتتاۋدىڭ جولى تابىلدى

 استانا. قازاقپارات - بارلىق قاجەتتى زاتتاردى موبيلدىك قوسىمشا ارقىلى جەرگىلىكتى تۇرعىنداردان ۋاقىتشا الا تۇرۋعا بولادى.

جاپوندىق كاسىپكەر شيمپەي ۆاتانابە ساياحاتشىلارعا ارناپ قۇرعان Locarry دەپ اتالاتىن قاۋىمداستىقتىڭ ارقاسىندا ەندى ەشقانداي جۇك الماي، ساياحاتقا شىعۋ مۇمكىندىگى تۋدى. سەبەبى، قاۋىمداستىققا مۇشە بولعان جەرگىلىكتى تۇرعىنداردان بارلىق قاجەتتى زاتتاردى ۋاقىتشا پايدالانۋعا بولادى.   

 Lonely Planet-تىڭ حابارلاۋىنشا، بۇل يدەيا ۆاتانابەگە ساپار بارىسىندا كەزدەيسوق كەلگەن. «بۇل يدەيا ماعان قىتايعا ساپارلاۋ كەزىندە كەلدى. مەن وزىممەن بىرگە قاجەتتى زاتتار مەن كيىم- كەشەك سالىنعان ۇلكەن چەموداندى سۇيرەتىپ جۇرۋىمە تۋرا كەلدى. مۇنى كورگەن مەنىڭ دوستارىم ماعان بۇلاي قينالماۋدى، قاجەتتى زاتتاردى وزدەرى- اق پايدالانۋعا بەرە تۇراتىنىن ايتتى»، - دەيدى ول.

ۆاتانابە قاجەتتى زاتتاردى «قولدان- قولعا» نۇسقاسىمەن جالعا نەمەسە ساتىپ الۋعا بولاتىن قوسىمشالار مەن سايتتاردى مۇقيات زەرتتەپ شىعىپ، ناتيجەسىندە Locarry قوسىمشاسىن ازىرلەپ شىعاردى. مۇندا ساياحاتشىعا قاجەتتى كيىم-كەشەكتەردى، سۇلگى-ورامالداردى، سپورت تاۋارلارىن، ءدۇربى جانە كۇركە (پالاتكا) سەكىلدى نارسەلەردى ۋاقىتشا پايدالانۋ ءۇشىن الا تۇرۋعا بولادى. جەرگىلىكتى تۇرعىندار ساياحاتشىلارعا ۋاقىتشا بەرە تۇراتىن زاتتارىنىڭ سيپاتتاماسى مەن فوتولارىن جاريالايدى. وسى زاتتاردى پايدالانۋعا نيەت ەتكەن ساياحاتشىلار وزدەرى تاڭداعان زاتتارعا ءوتىنىش جولداپ، كەلگەن كەزدە الىپ پايدالانا تۇرادى دا، ساياحات سوڭىندا يەسىنە قايتارىپ بەرەدى.

سەرۆيس ازىرشە جاپونيا، ا ق ش، كانادا، سينگاپۋر، ۆەتنام، تايلاند، گونكونگ جانە تايۆاندا عانا قولجەتىمدى.

دەرەككوزى: www.moya-planeta.ru