عالىمدار: قانت ادام ءومىرىن ۇزارتادى

  استانا. قازاقپارات - امەريكانىڭ بريگحەم اۋرۋحاناسىنداعى زەرتتەۋ ورتالىعىنىڭ ساراپشىلارى قانت پەن كومىرسۋلاردىڭ جالپى ءقاۋپى تۋرالى بارلىق اڭىزدى تولىعىمەن جوققا شىعارىپ، ولاردىڭ ادام ومىرىنە پايدالى ەكەنىن انىقتادى.

عالىمداردىڭ زەرتتەۋى قانتتى قالىپتى مولشەردە قولدانۋ ادامداردىڭ ورتاشا ءومىر ءسۇرۋ ۇزاقتىعىنىڭ وسۋىنە اكەلگەنىن كورسەتتى، دەپ جازادى Stan.kz اقپاراتتىق اگەنتتىگى.

شامامەن 25  جىل بۇرىن ساراپشىلار 45-64 جاستان اسقان 15 مىڭنان استام ەرىكتىلەردەن سۇحبات الىپ، وزدەرىنىڭ زەرتتەۋىن جۇرگىزدى. ساراپشىلار ساۋالناماعا قاتىسۋشىلاردان كۇندەلىكتى تاماقتانۋ راتسيونى تۋرالى ناقتى جاۋاپ بەرۋلەرىن جانە ولاردان بەلگىلەنگەن كيلوكالوريانى ساقتاۋدى سۇرادى. عالىمدار قاتىسۋشىلارعا 500دەن 4200 كيلوكالورياعا دەيىن پايدالانۋعا رۇقسات بەردى.

25 جىلدىق باقىلاۋدان عالىمدار بەلگىلى ءبىر مەديتسينالىق سەبەپتەر بويىنشا 6 مىڭنان استام ادامنىڭ قايتىس بولعانىن انىقتادى. ال، ولار تاماقتانۋ راتسيونىن ساقتاماعاندار.

25 جىل بۇرىن زەرتتەۋگە قاتىسقان جانە امان قالعانداردىڭ تاماقتانۋ ءتارتىبىن تالداعان عالىمدار كومىرسۋلار مەن قانتتىڭ قالىپتى مولشەرى دەنساۋلىقتى نىعايتىپ، جۇرەك- تامىر جۇيەسى جۇمىسىنىڭ «سەنىمدىلىگىن» ارتتىرادى دەگەن قورىتىندىعا كەلدى. ولاردىڭ زەرتتەۋى «قانت پەن كومىرسۋدى» قالىپتى مولشەردە تۇتىنعانداردىڭ ورتاشا ءومىر ءسۇرۋ ۇزاقتىعى 33 جىلعا ۇزارعانىن كورسەتتى.

ەندى زەرتتەۋشىلەر قانداي تاماقتانۋ راتسيونىنا ارنالعان پراكتيكالىق ۇسىنىستاردىڭ اۋرۋلاردىڭ بەلگىلى ءبىر توبىنا شالدىققان ناۋقاستارعا بەرۋ كەرەك ەكەنىن انىقتاۋدا.