قىرعىزستانداعى قازاق دياسپوراسىنىڭ ءتوراعاسى بولىپ جوگوركۋ كەنەش دەپۋتاتى سايلاندى

بىشكەك. قازاقپارات - بىشكەكتە قىرعىزستان قازاقتارى قاۋىمداستىعىنىڭ كەزەكتەن تىس سەزى بولدى.

وندا جاڭا ءتوراعا سايلانىپ، ۇيىمنىڭ جارعىسىنا تۇزەتۋلەر ەنگىزىلدى، دەپ حابارلايدى «قازاقپارات» ح ا ا «كابار» اگەنتتىگىنە سىلتەمە جاساپ.

سەزد قىرعىز رەسپۋبليكاسى جوگوركۋ كەنەشىنىڭ دەپۋتاتى گۇلشات اسىلبايەۆانى ءبىراۋىزدان قازاق دياسپوراسىنىڭ ءتوراعاسى ەتىپ سايلادى.

ول سەزد قاتىسۋشىلارىنا وزىنە سەنىم ارتقانى ءۇشىن العىس ءبىلدىرىپ، قاۋىمداستىقتىڭ ەلدىڭ قوعامدىق- ساياسي ومىرىندەگى ماڭىزىن تىلگە تيەك ەتتى. قىرعىزستان حالقىنىڭ بىرلىگىن نىعايتۋ ماسەلەلەرىندە مەملەكەتتىك بيلىكتىڭ بارلىق تارماعىمەن ءوزارا ىقپالداستىعىن اتاپ كورسەتتى.

گۇلشات اسىلبايەۆا شارا قاتىسۋشىلارىن قۇربان ايتپەن قۇتتىقتاپ، بىرلىك، ىنتىماق، ەلدىڭ بەيبىت گۇلدەنۋىن تىلەدى.

ودان ءارى قاۋىمداستىقتىڭ الداعى دامۋ ماسەلەلەرى تالقىلانىپ، جوسپارلار بەلگىلەندى.