ءۇش كۇن كوز ىلمەي توقىما توقىعان جەتىسۋلىق رەكوردتار كىتابىنا ەندى
29 جاستاعى جىگىت ءۇش كۇننىڭ ىشىندە 43 مەترلىك ۇزىن شارفى توقىپ شىقتى. ەندى ول الەمدىك رەكوردتتى جاڭارتپاق نيەتتە، دەپ حابارلايدى قازاقپارات ءتىلشىسى.
«برازيليالىق ازامات 65 ساعات ءۇزىلىسسىز توقىما توقىپتى. نۇرلان جارتىبەكوۆ بۇل رەكوردتان اسىپ ءتۇستى. سوندىقتان ءبىز بارلىق ماتەريالداردى جيناپ، الەمدىك دەڭگەيدەگى رەكوردتار كىتابىنا جولداۋعا نيەتتەنىپ وتىرمىز. نۇرلان ءۇش كۇن بويى ۇيقىسىز، كوز ىلمەي توقىما توقىعاندا ونىڭ بارلىق ۋاقىتى باقىلاۋدا بولدى. بارلىق ءساتى ارنايى بەينەباقىلاۋعا جازىلىپ وتىردى جانە نۇرلاننىڭ دەنساۋلىعىن مەديتسينا قىزمەتكەرلەرى باقىلادى. ءبىزدىڭ فوتوگراف ماماندار دا جانىندا بولدى»، - دەدى الماتى وبلىستىق جاستار رەسۋرستىق ورتالىعى ديرەكتورىنىڭ ورىنباسارى دينا ءابىلماجينوۆا.
نۇرلان جارتىبەكوۆ بالا كۇنىنەن توقىماعا ماشىقتانعان، ونەرلى جىگىت بۇل جولعى رەكوردىن 13- تامىز كۇنى كەشكى ساعات 17:00 دە باستاپ، 16- تامىز كۇنى ساعات 19:00 دە اياقتادى. «Jetisu style» وبلىستىق جاستار فەستيۆالىندە نۇرلاننىڭ توقىماسى مارەگە جەتىپ، قازاقستاننىڭ رەكتوردتار كىتابىنىڭ ارنايى سەرتيفيكاتى تابىس ەتىلدى. سونداي-اق الماتى وبلىسىنىڭ اكىمى اماندىق باتالوۆ العىس حاتىمەن ماراپاتتادى.
ايتا كەتەيىك، بۇگىن تالدىقورعاننىڭ قاراتال وزەنىنىڭ جاعالاۋىندا «Jetisu style» وبلىستىق جاستار فەستيۆالى ۇيىمداستىرىلدى. وبلىس باسشىسى اماندىق باتالوۆ قاتىسقان كەشتە 25 ءتۇرلى شارا ۇيىمداستىرىلدى. ءبىر الاڭدا 100 گە جۋىق دومبىراشى كۇي شەرتسە، ءبىر الاڭدا ءتۇرلى كورمەلەر ءوتتى. الماتى وبلىستىق جاستار ساياساتى ماسەلەلەرى باسقارماسى مەن جاستار رەسۋرستىق ورتالىعى ۇيىمداستىرعان شارادا تۇرعىندارعا تەگىن قاربىز تاراتىلىپ، ارنايى كونسەرتتىك باعدارلاما دا شىمىلدىعىن ءتۇردى.
تالدىقورعاندىقتاردىڭ قاراسى قالىڭ بولعان فەستۆالدە Raim Artur دا بولدى. ولاردىڭ «سامايا ۆىشكا» انىنە وتشاشۋ شاشىلىپ، حالىققا تاماشا كوڭىل-كۇي سىيلادى.