قازاقستاندا پورتتاردى قورعاۋدى باعالاۋ ءۇشىن ۋاكىلەتتى ورگان بەلگىلەندى
مينيسترلىككە قاراستى كولىك كوميتەتى ءتوراعاسىنىڭ بۇيرىعىمەن پورتتىق قۇرالدارىن قورعاۋدى باعالاۋ بويىنشا جۇمىستاردى اتقاراتىن جانە پورتتىق قۇرالدارىن قورعاۋ بويىنشا جوسپاردى جاسايتىن ۋاكىلەتتى مەكەمە بولىپ «اقتاۋ حالىقارالىق تەڭىز ساۋدا پورتى» ۇ ق ا ق (اقتاۋ ح ت س پ) بەلگىلەندى.
«بۇگىنگى كۇنى قازاقستاندا 3 تەڭىز پورتى جۇمىس جاسايدى - اقتاۋ، باۋتينو جانە قۇرىق. وسى ستراتەگيالىق وبەكتىلەر ينفراقۇرىلىمدارىن قورعاۋ ماقساتىندا كوميتەت 2017 -جىلى كەمەلەردى جانە پورتتىق قۇرالداردى قورعاۋ جونىندەگى حالىقارالىق تەڭىز مەكەمەسىنىڭ تالاپتارىن يمپلەمەنتاتسيالاۋ بويىنشا جۇمىستاردى ىسكە اسىردى» ، - دەلىنگەن حابارلامادا.
وسىعان سايكەس حالىقارالىق رەيستەردى جاسايتىن اۋىر جۇك (500 دەن استام رەگيسترلىك توننا) جانە جولاۋشىلار كەمەلەرىنە قىزمەت كورسەتەتىن پورتتىق قۇرالدارىن قورعاۋدى باعالاۋدا نەگىزدەلگەن جوسپار بولۋى ءتيىس. وسى جۇمىستى جاساۋ ۋاكىلەتتى مەكەمەگە جۇكتەلەدى.
ايتا كەتەرلىگى، پورتتىق قۇرالدار قاتارىنا كەمەلەرگە قىزمەت كورسەتەتىن جانە حالىقارالىق رەيستەردى جاسايتىن تەڭىز تەرمينالدارى، سونىمەن قاتار تەڭىز پورتىنىڭ اكۆاتورياسى، سونىڭ ىشىندە تۇراقتار، كۇتۋ ورىندارى، تەڭىز پورتىنا كىرىستەر جاتادى.
