قازاق- وزبەك شەكاراسىندا جۇك كولىكتەرىنىڭ «ۇيمەلەپ» قالۋىنا نە سەبەپ
ۆەدومستۆو مالىمەتىنشە، مۇنداي جاعداي اعىمداعى جىلدىڭ ناۋرىز ايىنان بەرى بايقالىپ وتىر.
«وزبەكستان رەسپۋبليكاسىنىڭ تاياۋ جانە الىس شەت ەلدەرمەن سىرتقى ساۋدا- ساتتىعىنىڭ دامۋىنا بايلانىستى قازاقستان اۋماعى ارقىلى وزبەكستان رەسپۋبليكاسى باعىتىنداعى تاۋار اعىمىنىڭ ايتارلىقتاي ۇلعايۋى بايقالادى. وسىعان بايلانىستى قازاقستان تاراپىنان «ب. قونىسبايەۆ» وتكىزۋ بەكەتىنە وتكىزۋ الدىندا 50 دەن 100 گە دەيىنگى جۇك كولىكتەرىنىڭ جينالىپ قالۋى باستالدى. «ب. قونىسبايەۆ» بەكەتىنىڭ وتكىزۋ قابىلەتى تاۋلىگىنە 150 اۆتوكولىك قۇرالىن قۇرايدى. كەدەن بەكەتى كۇشەيتىلگەن تاۋلىكتىك رەجىمدە جۇمىس ىستەۋدە جانە ءوزىنىڭ وتكىزۋ قابىلەتى شەگىنەن اسىرا تاۋلىگىنە 250 گە دەيىن كولىك قۇرالىن قابىلداۋدا» ، - دەپ اتاپ ءوتتى ۆەدومستۆودان.
تامىز ايىنىڭ باسىندا جۇك كولىكتەرىنىڭ كەپتەلىسى ءوزىنىڭ ەڭ جوعارى شەگىنە جەتتى. وسى ۋاقىتتاعى كولىك اعىنى تاۋلىگىنە 215 كە دەيىن جۇك كولىگىنە جەتىپ وتىر.
«وسى ارالىقتا تەحنيكالىق سەبەپتەرگە بايلانىستى وزبەك تارابى تاۋلىكتىڭ وتكىزۋ شەگىن 100 بىرلىككە (وعان دەيىن تاۋلىگىنە 130-140 جۇك كولىگىن وتكىزگەن) دەيىن تومەندەتتى. اتالعان جايتقا وراي 7 - تامىز كۇنى بۇل ماسەلەنى شەشۋ ءۇشىن مەملەكەتتىك كىرىستەر كوميتەتى وزبەكستان رەسپۋبليكاسى مەملەكەتتىك كەدەن كوميتەتىنە حات جولدادى. سونىمەن قاتار شەكارالاس وڭىرلەردىڭ كەدەن ۆەدومستۆولارى باسشىلارىنىڭ ەكىجاقتى كەزدەسۋلەرى جۇرگىزىلدى. ەكى كەدەن بەكەتىنىڭ باسشىلارى كۇن سايىن كولىك قۇرالدارىن وتكىزۋدى جەدەلدەتۋ ماسەلەسى بويىنشا كەزدەسۋ وتكىزۋدە» ، - دەيدى كوميتەتتەن.
مۇنان بولەك، قازاقستان تاراپىنىڭ «ب. قونىسبايەۆ» بەكەتىن جاڭعىرتۋ جانە كەڭەيتۋ بويىنشا جوبالىق- سمەتالىق قۇجاتتى ازىرلەپ جاتقاندىعى ايتىلعان. جوبا جۇزەگە اسقاننان كەيىن بەكەتتىڭ تاۋلىكتىك وتكىزۋ قابىلەتى 1 مىڭ كولىك قۇرالىنا دەيىن ارتاتىن بولادى. قۇرىلىس مەرزىمى - 19 اي.
«سوڭعى اپتادا وزبەك تاراتى اۆتوكولىك قۇرالدارىن وتكىزۋ مۇمكىنشىلىگىن تاۋلىگىنە 150 كولىككە دەيىن جەتكىزدى. 16 - تامىزدا ولاردىڭ ق ر تاراپىنداعى شوعىرلانۋى 190 كولىككە دەيىن قىسقاردى. تاياۋ ۋاقىتتا احۋال تۇراقتالادى» ، - دەيدى ۆەدومستۆودان.
