بولات باقاۋوۆ: اۋىلداعى جاس پەداگوگتارعا باسپانامەن كومەكتەسۋ كەرەك
اۋىلدا جۇمىس جاساۋعا اتتانعان جاس مامانداردىڭ كوبىسىن مازالايتىن ماسەلە جايلى اپپاراتتىق جيىندا تاعى دا ءسوز قوزعالدى.
«بيىل وبلىستاعى ءبىلىم بەرۋ ۇيىمدارىنا 112 جاس مامان كەلدى، - دەدى ءبىلىم باسقارماسىنىڭ باسشىسى ءدىنيسلام بولاتحان ۇلى. - الايدا، ءۇي بەرۋ ماسەلەسى بۇرىنعىداي وزەكتى بولىپ وتىر. وتكەن جىلى اۋىلدىق مەكتەپتەردەگى 335 ماماننىڭ 33 ءى عانا ۆەدومستۆولىق جانە جالعا بەرىلەتىن باسپاناعا قولى جەتكەن. قالعاندارى بىرەۋدىڭ ۇيىندە نەمەسە اتا-اناسىمەن تۇرۋدا».
پاۆلودار وبلىسىنىڭ اكىمى ورىن الىپ جاتقان جاعدايدىڭ سەبەبىن انىقتاۋدى تاپسىردى. ويتكەنى، اۋىلداردا ەكىنشى نارىقتاعى ۇيلەرمەن ماسەلە جوق. ال جاس ماماندارعا ارنايى كوتەرمە اقى تولەنەدى.
«جاعدايدى ساراپتاۋدان وتكىزىپ، سوڭعى ەكى جىلدا «ديپلوممەن اۋىلعا» باعدارلاماسى ارقىلى كەلگەندەرمەن جۇمىس جاساڭىزدار، - دەدى ءوڭىر باسشىسى. - ەگەر بۇل باعدارلاماعا بولگەن رەسۋرس جەتپەسە، ايتىڭىزدار. ەگەر ەكىنشى نارىقتاعى ۇيلەر جوق بولسا، بىزگە جەتكىزىڭىزدەر. ەگەر باسپانامەن كومەكتەسە الماساڭىزدار اۋىلعا كادرلاردى قالاي ورنالاستىرماقسىزدار؟ بۇل سۇراقتى ءبىرىنشى كەزەكتە شەشۋ كەرەك. ولاي بولماعان جاعدايدا جاس مامان ءبىر جىلدان كەيىن كەتىپ قالادى دا، كوتەرمە اقىنى قالاي قايتاراتىنىن بىلمەي باسى قاتادى».
سونىمەن قاتار، بولات باقاۋوۆ بوس قالىپ جاتقان اگرارلىق كوللەدجدەردىڭ عيراتتارى جونىندە تاعى دا قول استىنداعىلارىنىڭ ەسىنە سالدى.
«وتكەن اپتادا ۋسپەن اۋدانىنداعى كوللەدجبەن نە بولىپ جاتقانىن كوردىك، - دەدى وبلىس اكىمى. - بۇل وقۋ مەكەمەسى عيمارتتارىنىڭ 30 پايىزى قولدانىلمايدى. بۇل جەردە شۇعىل امال قولدانۋ قاجەت. قيراتىلسا ەشكىمگە بەرە المايمىز. سوندىقتان ازىرگە عيمارات ءبۇتىن جانە جىلۋ بەرىلەتىن جاعدايدا تۇرعاندا كىمگە بەرۋ كەرەكتىگىن ويلاڭىزدار. بۇل سول جەردەگى اكىمدەرگە دە بايلانىستى».
