كاسىپكەر بيزنەسىن اۋىلداستارىنا بەرىپ جاتىر

ورال. قازاقپارات - باتىس قازاقستان وبلىسىنىڭ تەرەكتى اۋدانىنداعى فەدوروۆكا اۋىلىندا بىرنەشە قايىرىمدىلىق جوباسى ىسكە اسىرىلىپ جاتىر، دەپ حابارلايدى قازاقپارات ءتىلشىسى.

مۇندا ءىرى ساۋىقتىرۋ كەشەنى سالىنىپ جاتىر. وسى باستامانى كوتەرىپ ءارى دەمەۋشى بولىپ وتىرعان - مەتسەنات سەرجان يدياتوۆ.

«فەدوروۆكا اۋىلىندا ساۋىقتىرۋ كەشەنىن سالۋ - مەنىڭ جوبام، ونى ءوزىم ىسكە اسىرىپ جاتىرمىن. قابىرعاسىن كوتەرىپ قويدىق، ءقازىر توبەسىن جاۋىپ جاتىرمىز. جوسپار بويىنشا 2019 -جىلى پايدالانۋعا بەرەمىز» ، - دەيدى بيزنەسمەن.

ول ىزگى يدەيانىڭ تۋىنداۋ سەبەبىن ايتتى.

«فەدوروۆكا اۋىلى - قوعامدىق مونشاسى جوق جالعىز اۋدان ورتالىعى. كەيبىر اۋدان ورتالىقتارىندا قوس- قوستان وسىنداي كەشەن بار. بۇدان تىس، فەدوروۆكا - مەنىڭ تۋعان اۋىلىم. سوندىقتان وسى جەردە 100 ادامعا ارنالعان مونشا سالۋعا ۇيعاردىم. قىزمەتتەر اياسىن كەڭەيتىپ، جابىق باسسەيندى دە قوستىق. ويتكەنى بىزدەگى جاز قىسقا. بۇدان تىس، كەشەندە جاڭا تەحنولوگيالارمەن اس ازىرلەيتىن پيتستسەريادا بولادى» ، - دەيدى مەتسەنات.

ءبىراق بيزنەسمەن بۇل كەشەن ارقىلى تابىس تابۋدى ويلاپ وتىرعان جوق.

«كەشەنگە جۇمسالعان قاراجاتتىڭ وتەلۋىنە بىرنەشە جىل كەتەدى. ەگەر ونى قالاعا سالعانىمدا، شىعىنى از بولىپ، جىلدام وتەلەتىن ەدى» ، - دەيدى س. يدياتوۆ.

فەدوروۆكا اۋىلىنىڭ تۇرعىندارى كەشەننىڭ سالىنىپ ءبىتۋىن تاعاتسىزدانا كۇتىپ ءجۇر. دەگەنمەن بۇل مەتسەناتتىڭ تۋعان اۋىلىنا جاساعان العاشقى قايىرىمدىلىعى ەمەس.

«بۇعان دەيىن اۆتوبۋستار ساتىپ الىپ، باعدارعا قوستىم، زاماناۋي ايالداما پاۆيلوندارىن، دۇكەندەر سالعىزدىم. ويتكەنى، اۋىلدىڭ اراسى ۇزاق، بالالار مەكتەپكە بارۋ ءۇشىن 4 شاقىرىم جول جۇرەدى. قازىر ەكى ايالدامانىڭ قۇرىلىسى اياقتالدى» ، - دەيدى مەتسەنات.

كەشەن قۇرىلىسى اياقتالعان سوڭ مەتسەنات ونى جەرگىلىكتى ىسكەرلەرگە تەگىن بەرمەك.

«ولار بۇل نىسانداردا ءوز جوبالارىن ىسكە اسىرۋىنا بولادى. كونكۋرس جاريالاعانبىز، بولاشاعى زور جوبالاردى قاراپ جاتىرمىن. ىرىكتەلگەن جوبالاردىڭ اۆتورلارىنا نىسانداردى تەگىن بەرەمىن» ، - دەيدى س. يدياتوۆ.

2017 -جىلعى 12 - ساۋىردە قازاقستان پرەزيدەنتى نۇرسۇلتان نازاربايەۆ «رۋحاني جاڭعىرۋ» اتتى كولەمدى ماقالاسىندا «تۋعان جەر» باعدارلاماسىن ىسكە اسىرۋدى ۇسىنعان بولاتىن.

باعدارلاما اياسىندا قازاقستاندىقتار بۇكىل رەسپۋبليكادا ءوز قاراجاتتارىنا ءتۇرلى جوبالاردى ىسكە اسىرىپ، تۋعان ولكەسىن دامىتۋعا ۇلەس قوسىپ كەلەدى.