قازاقستاندىق كاسىپكەرلەر موڭعولياعا بارادى

استانا. قازاقپارات - 2018 -جىلعى 4-5 - قازاندا ۇلان- باتىر قالاسىندا (موڭعوليا) رەسمي ساۋدا- ەكونوميكالىق ميسسيا وتەدى. قازاقستاننىڭ سىرتقى ساۋدا پالاتاسى وتاندىق كاسىپكەرلەردى وسى ساۋدا- ەكونوميكالىق ميسسياعا قاتىسۋعا شاقىرادى، دەپ حابارلايدى پالاتانىڭ باسپا ءسوز قىزمەتى.

ءىس- شارانىڭ ماقساتى - قازاقستاندىق جانە موڭعول كاسىپكەرلەرى اراسىنداعى ساۋدا قاتىناستارىن دامىتۋ، ەكى ەل اراسىندا ىسكەرلىك بايلانىس ورناتۋ.

ميسسيانىڭ باعدارلاماسىندا: ساۋدا- ەكونوميكالىق فورۋمعا قاتىسۋ، ۇلان- باتىردىڭ مەملەكەتتىك بيلىك ورگاندارىنىڭ وكىلدەرىمەن ىسكەرلىك كەزدەسۋ، موڭعوليانىڭ كاسىپكەرلەرى مەن ۇيىمدارىنىڭ وكىلدەرىمەن ىسكەرلىك بايلانىس جوسپارلانىپ وتىر.

ءىس- شارانى قازاقستاننىڭ سىرتقى ساۋدا پالاتاسى «اتامەكەن» ۇلتتىق كاسىپكەرلەر پالاتاسىمەن، ينۆەستيتسيالار جانە دامۋ مينيسترلىگىمەن، قازاقستان رەسپۋبليكاسىنىڭ موڭعولياداعى ەلشىلىگىمەن جانە موڭعوليانىڭ ۇلتتىق ساۋدا- ونەركاسىپتىك پالاتاسىمەن بىرلەسىپ ۇيىمداستىرادى.